La Usc di Ladins

I 3 de messèl l é na dì che restarà scrita te la istoria de noscia Val: undesc persones à perdù sia vita sun Marmolèda a cajon de n destach del giacé, de ot i é resté ferii. N fon dolor che à padì la families; la comunanza de Fascia e del Paisc les ge se à strent dintornvia. Na tragedia che no se podea perveder e che te noscia Val à portà na gran prescion mediatica internazionèla nience da se fegurèr.

L é passà encomai doi egn da en chela dì, canche la machina di socorsc se à envià via a na tèl velozità per n aveniment storich, a memoria de om mai vedù dant. Con gran cher e solidarietà umana la jent entervegnuda à portà sie didament, sia vejinanza a la persones. Belimpont dut chest l é stat portà dant tel documentèr »03.07.22«, moscià en mercol passà lo dal Chino Marmolèda de Cianacei.

Semper en mercol da sera, don Mario Bravin à dit messa te gejia del Sacro Cher de Gejù. Te sia perdicia l à uzà fora la condizion scherpenta del om tedant a la forza de la natura: »L Segnoredie no l vel l padiment del om, no l é El che ne tol demez chi che ge volon ben. El l ne é vejin e te sia mans meton nesc compagnes«.

Ence el l é stat anter i prumes socoridores rué sun Marmolèda. Descheche l à contà tel documentèr, te n prum moment ence el l é entervegnù con 11 omegn sot sia responsabilità. 

De più su La Usc stampèda de en vender ai 12 de messèl.  (Nicoletta Riz)