La Usc di Ladins

L é stat proprio na bela festa. Na sera olache l'Union di Ladins de Fascia, che ensema con l'Union Generela di Ladins dla Dolomites à dat fora l nef liber de Fabio Chiocchetti, à volù envièr duta la persones che à amor per l ladin e rengrazièr duc chi che à dat sie contribut per meter ensema chest prezious regoi e ge l sporjer a la comunanza. 

Te la bela sala del Hotel Rizzi de Salin a Pera, fornida coi depenc de Franzeleto Bernard, l é stat sport mingol de speisa da zacan enjignèda con sie staff da Veronica, semper desponibola e sorida, e apede ence mingol de castagnes brostolèdes dai Paicenadores da Vich e la musega de Stefano e Marco col orghen.

Na vida lijiera e algegra per portèr dant vèlch de emportant e prezious, descheche l é la arpejon de nosc lengaz ladin.

»Paroles fora de crigna« l é l frut de enrescides engaissèdes, de studie etimologich fon, de confront avert anter la variantes ladines, e amò de coinvolgiment de la comunanza; n frut che, ence de gra a n stel divulgatif e gustegol, l é doventà semenza che à permetù de comedèr fai e strantenimec en cont de esprescions veies e pech cognosciudes, che era rué ence te libres e dizionères, e amò l à fat crescer e slarièr fora l enteres e l amor per l lengaz ladin e no per ultim l à didà a entener cotant che sie prezious poder aer a la leta i strumenc enjigné, la banches de dac, i tesć informatisé ti egn per meter ensema n corpus ladin più rich che l é meso, e cotant che sie emportant che la istituzions fae chel che serf acioche chisc strumenc i posse seghitèr a esser 'open source', descheche fèsc o cognessa fèr anchecondì duta la istituzions publiches, e a la leta de duc.

De più su La Usc stampèda de en vender ai 25 de otober.  (Lucia Gross)