La Usc di Ladins

L grop de robotica Gome Neve de la Scola Ladina de Fascia l à arjont n resultat de gran valuta en domenia passèda a la finèla nazionèla talièna de la First Lego League, co la calificazion al event internazionèl de robotica First Lego League WPI, che sarà dai 13 ai 15 de jugn a Worchester tel Massachusetts, ti Stac Unii.

La garejèda, te chela che l é stat cernù fora i gropes de joegn che raprejentarà la Tèlia de desferenc evenc mondièi de robotica fora per l’aisciuda che vegn, per la pruma outa la é stata metuda a jir ti veies Magasins del bombèsc a Genova, col endrez di profescionisć del team Scola de Robotica,  grop talian de ezelenza a livel internazionèl per la enrescides en cont de umanoidi e neva machines.

A Genova, a se descombater la venta, l era la 38 squadres de joegn che chest invern passà à passà via la selezions interregionèles, a cheles che à tout pèrt en dut passa 330 gropes de bec e bezes anter i 8 e i 16 egn pascioné de neva tecnologies e scienzes.
Anter duta la squadres che à tout pèrt a la finèla, a ruèr prum assolut l é stat l team MicolLego da Roveré Veronese, che de oril jirà a la finèla mondièla de la First Lego League a Houston. Etres 6 gropes à enveze otegnù l pass per tor pèrt a 6 evenc de robotica ti desferenc continenc del mondo: a Sydney, a Città del Capo, a Daytona Beach te la Florida, a Long Beach te la California, a Corinto te la Grecia e apontin a Worchester tel Massachussets, olache al scomenz del istà sgolarà l team fascian ‘Gome Neve’.

De più su La Usc stampèda de en vender ai 28 de mèrz.

 (Thomas Zulian)