La Usc di Ladins

Ulessan tò l’ucajion de ti respuender ala lëtra de Cristina Brunello tla edizion de La Usc di Ladins di 8 de setëmber dl 2023.

L Saslong Classic Club lëura da 30 mënsc incà, y plu avisa dal’ansciuda dl 2021 incà, ala planificazion dla candidatura y per prejenté tla miëura maniera chësc proiet dan la istituzions dla FIS, la istituzions cumeneles, provinzieles y dan la FISI taliana, per avëi l sustëni per la prozedura tecnica.

Da merz dl 2022 incà lëura n team de cin’ persones per mëter sun papier l dossier, n documënt de 225 plates che spiega a puntin l proiet. Nëus on purvà y purvon dl dut per pudëi realisé chësta manifestazion sportiva de Campiunac dl Mond de schi tl 2029, ma nia mé chësc: on cuntatà istituc de nrescida, jënt esperta tl ciamp dla sustenibiltà (Università de Padova), firmes y istituzions che nes à judà a mëter mpe y lauré ora chësc proiet cun la vijion y l respet che l se damanda. Son da stramp cuntënc che l ie unì metù mpe l Zënter de Mubiltà de Gherdëina. L ie unì tëut su cuntat cun l Ufize per la Mubiltà dla Proviniza bele da doi ani incà per cialé deberieda co miuré la mubiltà ntan n Mundiel y per lascé zeche de miëur ala generazions dl daunì. Son n cuntat cun la WHO, la Urganisazion Mundiela dla Sanità, (cun l dut. Franco Branca, diretëur dl Departimënt de Nutrimënt y Segurëza Alimentera) per lauré ora n proiet de alimentazion sana y cun prudoc da tlo ntan la manifestazion; son stac a truepa manifestazions sportives per reprejenté nosta valeda.
Nosta ntenzion ie la realisazion de na manifestazion sportiva cun la nfrastrutures che on, zënza mëter su purtoies o mplanc nueves o nchinamei desdrù la bela natura che on, coche vel’ un nes tira dant.
Y dantaldut sons per na comunicazion rëidla y trasparënta. Chëstes ie states la ucajions publiches per giapé nfurmazions n con’ dl proiet y l finanziamënt y per na descuscion davierta: sentedes publiches de Chemun ti trëi luesc dla valeda, ancunteda cun duta la lies ambientalistes de Gherdëina, sentedes publiches dla Lies dl Turism ti trëi chemuns dla valeda, ancuntedes cun reprejentanc dla Lia di Osć de Gherdëina, senteda generela dla Lia di Osć de Gherdëina, ancunteda cun i reprejentanc dl Cunsorz di mplanc portamont de Gherdëina y dla Mont de Sëuc, sentedes publiches cun la scoles de schi de Gherdëina, senteda generela dl Schi Club Gherdëina, ancuntedes cun la Lia per Natura y Usanzes y cun i reprejentanc de Südtirol, ancunteda cun l cunsëi nuef dla Lia per Natura y Usanzes, ancunteda cun la lia Zënza Sëida che se cruzia dla Bienela Gherdëina, senteda generela dl Saslong Classic Club.
Leprò iel mo la publicazion dl proiet te trëi rujenedes sun nosc sit www.saslong.org y l dossier pòssen ënghe liejer do passan te nosc ufizies tla str. Dursan 106 a Santa Cristina. Nosta portes ie for states y resterà inant daviertes per chi che ova y à dumandes o prupostes da fé. On for desmustrà despunibilità a ancunté la persones dl luech y nsci fajerons nce tl daunì.

N reprejentanza dl Saslong Classic Club,
Alexia Demez, Marta Covi, Hannes Kröss, Rainer Senoner