La Usc di Ladins

En cont al articol vegnù fora su la Usc di Ladins nr. 35 dai 6/9/2024, olache vegn contà del projet che à vent l concors per fèr su la neva senta del Comun General de Fascia, mete dant duta mia marevea ti confronc de nesc aministradores, che più che duc cognessa aer chel fondament e ferstont de vardèr via noscia storia e la reijes de noscia val.
Per chi che no cognosc l fat, rejone de la pissèda da man de la jonta del Comun General de Fascia vidèda dal Procurador Giuseppe Detomas de jir a bater en toc la veia caserma austriaca, doentèda dapò sot l fascism colonia alpina milanese con l inom de Vittorio Veneto, per jir a fèr su n nef frabicat fora de anter che no se lea nia con l’autra casermes o colonies, che tegn ite duc i servijes sozièi de la Val de Fascia (Usl, Cèsa de paussa, CGF e Museo Ladin).
Chest per mie cont l é n pas faus, no l die pa a livel politich, ma l é stat metù massa pecia atenzion da man de aministradores che desche obietif te sie descorsc i à chel de stravardèr noscia identità e cultura ladina, ma coscita no someassa.
La costion no la é leèda a la sort de frabicat che cognessa doentèr e che l pel pièjer o manco, ma piutost al fat de aer metù ensema n concors de idees, enveze che chierir sobito zachei con competenzes aldò, che no tegne cont de la storia de n frabricat emportant leà a momenc storiches senestres descheche l é stat apontin la Gran Vera, che à ciapà ite duta la comunanza de Fascia de enlouta e che à segnà nosc dì d’anché.
Enceben che no fosse stat su n vincol da man di Bens Culturai de Trent, tout ju ti egn ’90 zenza rejon, no cognea esser la vertola per se n desfèr de chest frabicat che anter l auter de duta la 6 casermes o colonies l é ence chel più bel, stat senta di ofiziai austro-ungarics e tout ju te n muie de fotografies. A dita di esperc, anter i veies frabicac militares più bie de dut l Trentin.
Na esperienza beleche valiva l é stat chela del Stònt de Ciampedel, olache ence per chest picol frabicat no l era pervedù nesciuna sort de vincol e fossa stat possibol l bater ju. Demò la vijion de aministradores ascorc ne à permetù de poder l stravardèr e, n’outa rencurà, l aprijièr te sia forma più bela coscita da ge l sporjer desche picol museo tant a la jent da fora che a chi da chiò, percheche i posse cognoscer n toch de storia de sia val, che à revardà giaves e besaves.
N ejempie de lurier respetous de la storia e de sie segnificat per la jent, dut auter da chel metù dant enveze da na pèrt di aministradores del Comun General de Fascia, che i à desmostrà pecia o nesciuna cognoscenza sul pian storich e che doura competenzes tant chierides piutost malamenter.
Massa outes l é sozedù che la testimonianzes preziouses di tempes passé vegne toutes demez e descancelèdes zenza ge pissèr sora massa o per biot enteres de scioldi. N ejempie dedant i eies de duc, semper a Ciampedel, l é l zenter comerzièl de peton te Piaz, fat su al post del storich Albergo Mulino, una de la pruma ostaries de la val de sora che ge à dat da dormir ai maores alpinisć de la Dolomites fin da la metà del ’800. De chest frabicat resta demò l recort te la jent de età, desche canche i lo à batu ju, per i più joegn enveze giusta la veia chèrtes de posta.
Fossa ben fat che da chest burt ejempie e da n muie de etres stac, se posse emparèr vèlch da bon, perché, coche ne recordèa semper nosc storich Père Frumenzio Ghetta de Martin: n popol zenza storia, l é n popol zenza davegnir.

Gabriele Mambo Valentini, sentadin de Fascia