La Usc di Ladins

Co fóssel pa a judé pea pra la Crëusc Blancia?
N mierculdi ai 12 de lugio dala 20:00 nvieia la Crëusc Blancia de Gherdëina a na sëira de nfurmazion tl Zënter de Prim Aiut a Soplajes. L unirà spiegà cie che n possa dut fé coche ulenter o ulentera pra chësta lia
Scinca mpue de ti aurela a chi che à de bujën: la Crëusc Blancia de Gherdëina chier persones nteressedes a judé pea n valgun dis al mëns via per l di. Ai:ala ulenteres ti vëniel pità na bona furmazion y de biei mumënc te na grupa mutiveda y da ulëi bon. L lëur che n ie cherdei a fé ne n’ie mei da stufé, l ie for velch d’auter y de nuef y ala fin réstel la bela sensazion de avëi fat zeche de bon per l’autra jënt.
La sëira de nfurmazion che vën metuda a jì n mierculdi ai 12 de lugio dala ot da sëira tla sënta dla Crëusc Blancia a Soplajes ie davierta a duta la persones de uni età. N possa nce mé jì n iede a scuté su, zënza mpëni.
Plu nfurmazions giàpen dal respunsabl de servisc Hermann Delucca, al numer 335 642512.


Segra da La Val
Dui dis de festa, che mët man bele chësta sabeda domisdé cun l’alzada dl »Kirschtamichl«. La domënia, musiga y aurela cörta
La Jonëza da Paur y i Stödafüch da La Val á le plajëi da invié ala segra dl paisc, che vëgn festejada chësta fin dl’edema al 1. y ai 2 de messé. Le program mët man en doman sabeda dales 15:00 cun l’alzada dl »Kirschtamichl«. Dales 17:00 inant él spo musiga y da mangé. Dales 21:00 cina ales 2:00 de nöt sarál intratignimënt musical cun »Die Woazgruiba«.
La domënia mët man le program do la gran mëssa, canche al gnará dé fora da bëre, cun intratignimënt musical cun orghi da man. Dales 11:00 inant ciafarán ince da mangé. Dales 11:30 él spo la Musiga da La Val che tëgn conzert y domisdé dales 16:00 ales 20:00 sonará le grup »Lederhosenfeeling«. Ia por le de gnarál ince pité intratignimënt por mituns. Pici y gragn é bel inviá da gní a sté en compagnia.


Yoga sot ala luna colma
La Lia dl Turism de Sëlva mët a jì ntan l instà, n iede al mëns, n yoga sot ala luna colma sun Dantercëpies
Yoga fej bën al corp y al’ana. La Lia dl Turism de Sëlva mët a jì ëures de yoga samont sot ala luna colma. N se anconta sun Dantercëpies ai 3 de lugio, ai 1. de agost, ai 10 de agost y ai 31 de agost. L’ancunteda de juebia ai 10 de agost toma n l di de San Laurënz, l sarà nsci n’edizion particulera sot ala stëiles. L’ancuntedes ie a paiamënt.
Chi che ulëssa fé pea a una o a de plu ancuntedes ie prià:eda bel de se nuté su nchin al plu tert l di dant te una dla Lies dl Turism de Gherdëina o online sun la plata internet www.valgardena-active.com/it/estate.
Plu nfurmazions, nce n con’ di orares, giàpen cherdan su l numer 0471 777910.


Marcia de Gherdëina
La Lia di Ciambonfs de Gherdëina nvieia ala Marcia de Gherdëina, n dumënia ai 2 de lugio te Sëlva
N dumënia ai 2 de lugio iela inò tan inant: dutes y duc ie nviei a fé pea pra la Marcia de Gherdëina, n di a spaz te Sëlva te na blòta cumpanìa. N pëia via danter la 8 y la 12 daduman sun Plaza de Chemun de Sëlva, per fé pona deberieda na raida da cinch o diesc chilometri a pe.
Dala 12:00 inant nchin la 16:00 iel tl travert la premiazion cun l’autoriteies dl luech, velch de bon da maië y da bever.
Plu nfurmazions giàpen da Oswin Senoner al numer 335 6558633 o tres e-mail a oswin.senoner@gmail.com.


Conta l uele – vernissage de Caroline Comploi
L Circolo – Lia Mostra d’Ert nvieia ala giaurida dla mostra de Caroline Comploi, che sarà ai 30.06. dala 20:00, n ucajuon dla mostra culetiva »Conta l uele«
Caroline Comploi, nasciuda tl 1999, sta a Urtijëi y studieia al mumënt pitura tl’Academia de Unieja tl atelier 12. Si chedri a uele ie da udëi coche spiedl de n pensier spirituel che cumbat l desfrutamënt dla natura da pert dla persona.
La mostra »Conta l uele« porta adum lëures inuvatifs che abina sinergies danter tecniches desferëntes dla pitura dl uele sun tëila. Ntan la trëi enes de lugio unirà la sala dla mostres cureda da un:a artist:a al iede, for per n’ena: dai 30 de juni nchin ai 6 de lugio saràl metù ora lëures de Caroline Comploi. Orares de giaurida: uni di 16.00 – 19.00, sada y dumënia: 10:00 – 12:00.


Segra de Urtijëi
La Mujiga de Urtijëi Ve nvieia ala festa n ucajion dla Segra de Urtijëi n sada ai 8 y dumënia ai 9 de lugio sun Plaza de Sant Antone
La festa scumëncia n sada dala 12:00 cun ntratenimënt dla Böhmische de Albeins y dala 17:00 cunzert dla mujiga de Mühlen in Taufers. Dala 20:30 inant ve tën la grupa Vollbluet cumpanìa.
N dumënia ai 9 de lugio dala 09:00 saràl la Santa Mëssa te dlieja de Urtijëi. Dala 10:00 jiràla inant cun la defileda dla trohtes y cun la mujiga de La Ila che tenirà si cunzert dala 11:00. Dala 14:00 inant saràl n cunzert dla mujiga de Sarnthein y dala 17:00 inant ntratenimënt cun la grupa Rifflblech.
Ntan duta la dumënia puderà i mutons y la mutans se lascé depënjer l mus.
Da maië y da bever saràl assé per duc y dutes. La Mujiga de Urtijë se ncunforta sun Vosc unì y Ve mbincia na bela festa y n bon scuté sù!


Sëira dl vin
Tl raion da jì a pe »Bënunì« a Santa Cristina vëniel inò metù a ji la sëira dl vin, n vënderdi ai 7 de lugio dala 19:30 inant
Coche urmei tradizion pieterà na bela cum­pëida de ciuleies dal vin de gran inuem de Südtirol na cërcia de vins de gran cualità. Leprò saràl nce mesun se maië vel’ bon bucon servì pra de plu stonc sun ëur de streda y l ne mancerà sambën nia de bela mujiga suneda y cianteda dala grupes sun|sëida y Bayou Side.
Ve aspiton a Santa Cristina n vën­derdi ai 7 de lugio!


Jazz tl parch natural
Le Südtirol Jazz Festival röia dai 2 ai 4 de messé ince tl’Alta Badia y te Gherdëna, cun conzerc sön Gherdenacia, sön Pöz y te Val Longia
Da 41 agn incá vëgnel organisé te nosta provinzia le Südtirol Jazz Festival, cun conzerc te posć particolars y spetacolars, olache i musizisć mëss gonot ince se porté le stromënt sön la sciabla por arjunje la paladina. Dai 2 ai 4 de messé gnarál tigní de plü conzerc do le conzet dl »Hike & Jazz«, adöm al trio metü adöm da Siegmar Brecher, Valentin Schuster y Lorenz Raab. Ara se trata de trëi di mius musizisć jazz dl’Austria, che an podará aldí ai 2 de messé dales 14:00 te n conzert sön Gherdenacia, do che ai sará jüs sö a pe. Le de do jará le grup inant a pe cina ite en Pöz, olache ai sará ince da aldí dales 14:00 inant, por jí spo ai 4 de messé cina te Val Longia te Gherdëna por le conzert final dales 11:30. Vignun pó tó pert ai conzerc singolarmënter o ince a döta l’escurjiun de trëi dis cun i dui pernotamënc tles üties, adöm ai musizisć. Iscriziuns al  0471 982324 o por mail a info@suedtiroljazzfestival.com


Edema dla geologia
Tl’Alta Badia vëgnel tigní dai 3 ai 7 de messé l’Edema dla geologia – n festival dediché ales sciënzes geologiches, olache an pó descurí dötes les carateristiches dles Dolomites. L’ediziun da en chësc ann é ince patrozinada dala Sozieté Geologica Taliana
L’inaudaziun dl’Edema dla geologia vëgn tignida ai 4 de messé dales 21:15 tl salf dles manifestaziuns a Corvara, olache an pó ince vijité cina ai 22 de messé na mostra de corëc – dagnora dales 8:00 ales 12:00 y dales 15:00 ales 19:00. Ai 7 de messé dales 17:30 án ince la poscibilité da vijité la mostra adöm al geologh Paolo Ferretti.
Ciantuns didatics y n referat cun Volkmar Mair
Ai 03.07. vëgnel tigní n ciantun didatich sön Boé a Corvara adöm cun Matteo Rubatscher y ai 04.07. sö La Crusc adöm cun Rossana Todesco. Intrami é dales 11:00 inant, olache pici y gragn pó imparé val’ deplü sön nostes munts. Ai 06.07. dales 21:15 él spo le diretur dl Ofize geologia y proes materiales dla Provinzia de Südtirol dr. Volkmar Mair che tëgn na relaziun sön la formaziun di minerai dles Dolomites, tl salf dles manifestaziuns a La Ila.
Escurjiuns acompagnades
Fora por l’Edema dla geologia án ince la poscibilité da tó pert a escurjiuns organisades liades a chësta tematica: ai 05.07. da Piz Sorega cina al Pralongiá adöm cun Herwig; ai 06.07. sö dal ander de Conturines cun n acompagnadú dl Parch Natural Fanes – Senes – Braies y ai 07.07. dal Ju de Frara cina pro les cascades de Pisciadú adöm cun Rossana.
Geologia por i mëndri
Ince i mituns á te chëst’edema la poscibilité da imparé val’ sön la geologia. Insciö ésera ai 04.07. tratan l’escurjiun »Dolomiti Ranger« a San Ciascian; spo ai 05.07. passan n domisdé deboriada tl Museum Ladin Ursus ladinicus, cun dui laborators didatics; o ciamó ai 06.07. danmisdé imparan sciöche al gnô fat i corusc da depënje plüdadî, sön le lüch da Murin a Badia.
De plü informaziuns y prenotaziuns pro i ofizi turistics dl’Alta Badia o sön la plata internet www.altabadia.org . Ezeziun fej i laborators didatics tl Museum Ladin, olache les prenotaziuns é da fá diretamënter tl Museum.


Daurida cun »Les usc dla ligrëza«
En lönesc ai 10 de messé dales 21:15 mët man te dlijia de Badia le Festival Badiamusica 2023, cun musiga vocala taliana y musiga da orghe todëscia
La premiera dl Festival Badiamusica vëgn a s’al dé cun l’ensemble »Voces Iucunditatis« (Les usc dla ligrëza), metü adöm da Lia Serafini (sopran), Giulia Gabrielli (mezzosopran) y Franz Comploi al orghe. Sot al titul »Musiga vocala taliana incunta musiga da orghe dla Germania dl nord« gnarál porté dant musiga antica, danter l’ater de Dietrich Buxtehude, Alessandro Grandi, Johann Sebastian Bach, Claudio Monteverdi y d’atri.


»Il Decamerone. Vita e morte«
Le Festival Badiamusica pîta ai 13 de messé a Corvara n teater musical aladô dl Decamerone de Boccaccio. Protagonisć é »Philipp Lamprecht & Friends«
La serada dla jöbia ai 13 de messé dales 21:15 tl salf dles manifestaziuns a Corvara é na particolarité tl cërtl dl Festival Badiamusica. Al gnará porté dant le teater musical »Il Deca­merone. Vita e morte«, aladô de Giovanni Boccaccio, por dui aturs y trëi musizisć. La realisaziun y direziun musicala é de Philipp Lamprecht, che á ince metü jö i tesć deboriada cun Isa Weiß y André Hinderlich. Weiß y Hinderlich á tles mans la regia y fej da aturs y ciantarins. Ai gnará acompagná cun musiga sön stromënc d’epoca, portada dant da Susanne Ansorg (usc y stromënc medievai a archët y da zupfené), Ian Anderson (usc, erpa gotica, pia, whistle, zinch y tamburin), Philipp Lamprecht (usc, stromënc a percusciun storics, pauca, viola da roda, ciampanes storiches).