La Usc di Ladins

Posses’a te prejenté n curt?
Son Diego Kostner, nasciù ai 13.7.1962 y vive da for incà a Urtijëi, ulache é nce fat la scoles, la Scola d’Ert y po’, canche fove dal moster a mparé, la scola pru­fesciunela per lerneri. Son ma­ridà, éi doi mutans y n mut.

Co iela pa a vester scultëur, l ne n’ie nia plu tanc.
Do avëi fat l ejam da moster, éi n gran pert for ziplà sanc, roba sacrela.
L fova for roba nteressanta da fé, la roba tlassica univa y vën pu fata a mascin o de plastica, perchël éi for pudù ziplé figures nia scëmples, na mescededa de motifs desfrënc. A man vëniel for fat roba speziela, coche chëi che la aposta, la uel. Per fertuna éi for abù scialdi da lëur, ma n muessa bën dì che l mond dl ziplé se à mudà. Canche ove scu­­mencià la scola ulache n mpa­rova a ziplé, fans na tlas plëina. De chisc ne iel mé restei puec, belau duc à lascià o mudà lëur. Dantaldut ti ani 80-90 canche l fova manco da lëur, à trueps mudà mestier. Te chëi ani ne jìvel nia tan la roba fata a man, ajache la fova massa cëra n cun­front a chëla fata a mascin. Cie che se à ënghe mudà ie che ntlëuta fòvel truepa de gran berstotes, iló unìvel feter for fat la medema roba, i medemi sanc, chël fova plu saurì. Al didancuei vala belau for de fé dessënies, modiei y po’ canche i tlienc ie cuntënc, permò la figura granda. Dut va al didan­cuei nce plu de­bota, ajache n man­da dut tres whatsapp o e-mail. Zacan scrijò­ven lëtres via y ca y perchël passo­va datrai nce n ann nchin che l univa po apustà l sant. (SPM)