La Usc di Ladins

Na burta noela destënn süa ambria sura la Val Badia, chësta sabeda ai 5 d’otober danmisdé, olache al é sozedü n bur’ inzidënt. Le fat é sozedü sön n tru forestal che condüj dala vila de Costa a Badia y röia cina jö en Zija. L’ël, nasciü l’ann 1958, s’â metü sön tru cun süa Panda y á spo bonamënter pordü le control sön so auto, che é raité sura strada jö por na tëmpla. L’auto s’á pormó archité chi 100 y passa metri dessot, danter les trognores ite y val’ desëna de metri sura la Gadera sö. Sciöche an mina, podess l’inzidënt bele ester sozedü plü adora da doman, nes vëgnel dit. Pormó dan les 8 indere él sté zacai che á odü l’auto y á spo fat alarm. Söl post él gnü cherdé i stödafüch da La Val, che é por pröms rová söl post, lapró chi de Badia y alarmé án ince San Ciascian. Implü él rové i socoridus dl Aiüt Alpinisć Alta Badia, le joler dl Aiüt Alpin, la Crusc Blancia y i Carabiniers. Por l’ël êl indere massa tert; al n’é plü sté nia da nen fá. Che al palses tla pêsc de Chël Bel Dî.  (pablo)