La Usc di Ladins

Musiga, aurela cörta y sport a Corvara
Ai 4 y ai 5 d’otober vëgnel pité a Corvara n aperitif cun musiga, na festa stil »Oktoberfest« y ince n torné de ping pong
Les manifestaziuns vëgn organisades dal Ice Club Alta Badia y dal Tennis Club Ladinia, tla hala dl tennis a Corvara. Le program mët man en vëndres ai 4 d’otober dales 18:00 cun n aperitif y degustaziun de vins, acompagné dala musiga dl grup »Diadema«, cun le ghest spezial Petey Hop.
La sabeda ai 5 d’otober dales 10:00 vára inant cun na festa tl stil »Oktoberfest«, olache al sará da mangé, da bëre y intratignimënt. Dales 14:00 ales 19:00 sona i »Südtiroler Hoderlumpm« y da sëra él DJ Robby che mët sö musiga.
En chël de dales 14:00 inant gnarál ince desfiré n torné de ping pong, singul y dopl. Chi che ó fá para, pó se scrí ite anter i 2 d’otober tres Whatsapp pro Fabian Huber al 347 0424650 o pro Samuel Huber al 340 5732403. Le cost dl’iscriziun é de 20,00€. Sce an ó tó pert tl singul y tl dopl, spo 25,00€.

Fotografies de Gottfried Insam y films de testemunianzes de ëi dai lifc
L Cunsëi Furmazion de S. Cristina nvieia ala prejentazion de fotografies fates da Gottfried Insam da Cësanueva, n mierculdi ai 2 de utober dala 20:00 tla sala de Chemun a S. Cristina. L unirà nce mustrà films de testemunianzes de ëi de Gherdëina, che à metù sù n lift dai schi
La fotografies: Gottfried Insam da Cësanueva (1914–2004) à laurà coche fotograf dal 1937 nchin al 1947, nchin che l ie emigrà tl’Argentina. Dut l material da fotograf, danter chësc truepa de pitla scatules cun negatifs de scipa, ie restà te na majon tl sotët de Cësanueva.
Sun la lastes iel da udëi retrac de persones de Gherdëina, de uni età. Gran pert dla lastes à scrit su l inuem y cuinuem dla persona fotografeda o l inuem dla cësa o dl luech. Pra d’autres mancia chësta descrizions y perchël vëniel metù a jì na sëira dedicheda aposta a chësta fotografies, per damandé aiut dala populazion, per identifiché la persones sun la pultredes.
I films: de plu ëi che à laurà pea zacan, per mëter su i lifc dai schi, cunterà de ciunes che fova la ndesfides da ntlëuta, coche i straciova, sun cie che i messova cialé y coche i metova i furesć che univa a jì cun i schi, a ti judé a fé ji dut cant. I ne n cunterà de blòtes y de strambes.
Ntan la sëira puderan scuté su a chësta testemunianzes dal vif, sambën nce fajan dumandes. Duc i nteressei y duta la nteressedes ie nviei de cuer a chësta sëira nteressanta.

Ora de la set mesures
La Lia dl Teater Sëlva nvieia a unì a ti cialé a chësc pez da rì
La cumedia de Ray Cooney ie unida cianceda tl gherdëina da Moritz Demetz, che à sëurantëut nce la regia.
Sun palch saràl da udëi Juri Demetz, Moritz Demetz, Martin Avi, Tobias Nocker, Bruno Ma­ruca, Martin Runggaldier, Sara Perathoner, Ingrid Mussner, Christine Senoner, cun l’assi­stënza de Claudia Senoner, Helga Kerschbamer, Doris Pycha, Laura Senoner, Laura Lussardi, Ivan Senoner, Igor Demetz.
La première ie n sada ai 5 de utober dala 20:30 tla Cësa de Cultura de Sëlva–daldò saràl mo cin’ reprejentazions: merdi ai 8 y vënderdi ai 11 de utober–for dala 20:30, dumënia ai 13 de utober dala 17:00, mierculdì ai 16 y sada ai 19 de utober dala 20:30.
Chertes danora giàpen cherdan su l Mini­shop Sëlva al numer 0471 773133 (mé dan­mesdì).
La Lia dl Teater Sëlva se ncunforta sun vosc unì, ajache l sarà ORA DLA SET MESURES da rì!

La Bira Te Fascia
L Festival de la Bira artejanèla da mont chest fin de setemèna jun Ischia a Ciampedel
L Festival de la Bira artejanèla da mont te sie 10° cedean rua denef tel tendon jun Ischia a Ciampedel.
La sociazion Comunicarea te chesta edizion sporc 5 laboratories da birèr con passa 40 sorts de bira, cojina ladina, musega dal vif, Masterclass e l concors »Na Bira per Setember«.
L Festival aur si ujes con bira e magnadiva da les 11 da doman anché vender ai 27, en sabeda ai 28 e en domenia ai 29.
En vender e en sabeda: da les 16:00 Masterclass, degustazion vidèda e abinamenc con Unionbirrai (prenotazion: labiratefascia@gmail.com); da les 21:00 musega live coi gropes Fade e Starlight Band.
En domenia: da les 15:00 Masterclass; da les 17:00 premiazion del concors »Na Bira per Setember« e da les 18:00 sera l Festival.

Testimunianzes dl tëmp
Ncuei, vendërdi ai 27 de setëmber, vëniel giaurì tla galaria Vijion a Puntives na mostra dal titul “Testimunianzes dl tëmp”, cun l’opres di artisć Bruno Vallazza y Christian Kaufmann, che mostra su si capazità de se adaté ai mesuns tecnichs atuei
La tecnologies à da for incà abù na gran fazion sun l’ert y à fat da nflus al’esprescion y ala criatività artistica. Tla mesura te chëla che i mesuns se à svilupa, se à nce mudà la manieres de crië ert y de trasmëter l’ert. For inò se à i artisć adatà ala tecnologies de si tëmp, reprejentan y tenian cont dl’atualità. Cun la prejentazion di lëures di doi artisć de desfrënzia de generazions, coche Bruno Vallazza y Christian Kaufmann, uel la mostra “testimunianzes dl tëmp” mustré su si maniera de lauré, che se à adata ala puscibltà di materiai de si tëmp. Nscila coche Bruno à ntlëuta laurà l fier, nscila lëura Christian cun i mesuns digitei da ncuei. La Giaurida dla mostra ie ncuei, vënderdi ai 27 de setëmber, da mesa la 9 da sëira tla galaria Vijion a Puntives. La resterà davierta nchin ai 21.10.2024, da lunesc a n sada dala cater nchin la set domesdì o Cherdan su l numer 338 2098697.

Setemèna del azet
Teater, scontrèdes e laboratories te Fascia dai 27 de setember ai 5 de otober per endrez di Servijes Sozièi del Comun General
Ence chest an Fascia tol pèrt a la Setemèna del Azet del CNCA, ruèda a la X edizion. L tem de chest an l é T-essere Comunità e per endrez di Servijes Sozièi del Comun General vegn metù a jir chisc evenc.
Insnet vender ai 27 de setember da les 20:30 te teater del Oratorie de Poza i Bontemponi porta dant »Al piec no l é mai fin«.
En mercol ai 2 de otober a Poza »Festa di Giaves«: da les 15:00 messa e benediscion e do te Oratorie laboratorie »Jione a Tria?« per creèr leames anter generazions.
En jebia ai 3 de otober da da les 17:00 te senta del Comun general a Sèn Jan: »Fare Comunità – la costruzione di futuri possibili« col dr Francesco Brunori de Skopìa. En vender ai 4 de otober da les 16:00 »T-Esser comunità te duta la sajons«, prejentazion scomenzadives con la Coa di Picioi de Soraga, la Scolines e esibizion de la sociazion »Tango al buio«.
En sabeda ai 5 de otober da les 20:30 te Navalge a Moena spetacol »Feisbucsisters show« de la Filarmonica de Laives con la Sociazion Fiem Fascia Sport Inclusif.

Curs de ultim aiüt
A La Val en vëndres ai 11 d’otober 2024, dales 14:00 ales 18:00
Savëi ala fin coche ara vá. La fin dla vita y le morí de nüsc familiars, amisc y vijins nes fej gonot sintí perplesc, ajache le savëi secolar sön l’acompagnamënt ala mort é ti agn jü mancia. I orun dé les conescënzes de basa y dé coraje da ti sté dlungia a chi che mör. Les infermieres dl Raiun Sanitar dla Val Badia, cun na gran esperiënza te chësc setur, mët a jí n curs, olache an impara da socodí y da ti sté dlungia tla dërta manira a porsones che é tl morí. Le curs é debann y vëgn tigní por ladin. Le curs vëgn tigní a La Val tl Pice salf de Comun en vëndres ai 11.10.2024, dales 14:00 ales 18:00. Prëibel se anunzié danperfora cina ai 10.10.2024 sot al numer de telefon 0474 586155.