La Usc di Ladins

Do la curta paussa da d’invern, en domenia passada l campionat de Pruma Categoria l é endò peà via e coscita ence i bec del Fascia Balon i à tacà, con la pruma partida fora de ciasa te la Valsugana contra l Perjen.

Ti prumes menuc a venjer l é stat soraldut l ciamp, con nesciuna de le doi squadre bona de aer la soramessa su l’autra. Do n cart de ora, a la pruma ocajion de la partida, i patrogn de ciasa i passa con n balon metù te mez a l’area de rigor che l atacant met te sach da pec pasc dal usc.

Do aer ciapà l gol, Deflorian e compagnes i taca a spenjer per cerir l gol de la parità e a mez del temp l rua, con na trata dai undesc metres vadagnada da Massimo Lorenz de Meca e tramudada te n gol da Sebastiano Rasom de Gotart. 

Passa n pec de menuc e l é i patrogn de ciasa che podessa passar inant con na trata dai undesc metres: l joen portier fascian Simone Rasom de Rajum l é bon de ciapar l balon trat dal atacant valsuganot, ma do demò n menut l Perjen passa ampò inant con n gol de la domenia. 

Te la seconda part de la endesfida i joegn fascegn i jia miec e i proa a drezar la partida; do n cart d’ora rua l gol del 2 a 2 con Gabriele Riz de Janoto che do na bela combinazion con Matteo Bernard de Bernardo l met l balon tedò l portier de ciasa. 

De più su La Usc stampèda de en vender ai 23 de firé.  (Pierpaolo Rasom)