La Usc di Ladins

Rua de bona neves dai bec fascegn che se dèsc ju tel sport de la trata con l archet. Chest grop de joegn atlec te val i é coordené dal campion paralimpich Christian Seneca e per poder tor pèrt a la garejèdes a livel agonistich i fèsc pèrt de la sozietà sportiva Arcieri de Piné.

Dai 5 ai 8 de setember passé l é stat endrezà i Campionac taliegn Targa a Camaiore te la provinzia de Lucca, olache i Arcieri de Piné se à vadagnà 12 medaes con n gran contribut fascian: la touses se à vadagnà la medaa de or Junior a squadres col archet Compound con Ginevra Seneca ensema con Ilaria Melchiori e Sara Conci e la medaa de arjent Arlieves con l archet Olimpich semper con Ginevra Seneca con Evelin Betti e Ilaria Melchiori. I fenc i à concostà la medaa de bron a squadres Allievi col archet nut, con Matthias Dantone ensema con Elvis Leonardelli e Nicola Giovannini.

Dant da chest bon ejit l é stat desvaliva autra competizions olache i joegn fascegn à podù se sproèr e de spes ence se meter al luster.

Ence per Christian Seneca, campion paralimpich che ge stèsc do al grop de joegn atlec fascegn e al svilup de chest sport, l é ruà de bie resultac. El garejea con la Sozietà Arcieri Kappa Kosmos de Rorei e apede a la medaa de or provinzièla, ai campionac taliegn stac a Pesaro anter la fin de mé e i prumes de jugn l se à vadagnà n bron de categoria e n arjent assolut con archet Compound, doventan vizecampion talian. 

De più su La Usc stampèda de en vender ai 20 de setember.  (Lucia Gross)