La Usc di Ladins

Sion de mèrz, l meis che ne met dant la giornèda internazionèla de la eles e no pel esser nia de più bel che rejonèr de la tapa talièna di IIHF stac a Bornech anter i 3 e i 4 de mèrz. Te n sport che de spes l vegn conscidrà (e cernù) da omegn, a l’Intercable Arena de Bornech la lèrga é vegnuda touta duta da la eles.

En lunesc ai 3 e en mèrtesc ai 4 de mèrz defat se à dejout l nef apuntament del Prospect Camp de la eles, endrezà da la Italian Hockey Development Program tel chèder di IIHF Global Girls' Games. L event, che dal 2015 l sostegn la crescimonia del hockey de la eles, l à vedù la partezipazion de 40 atletes de la doi anèdes 2011 e 2012.

La doi giornèdes del Camp à vedù ence na vera endesfida anter Team Bianch e Team Brun che l se à jontà apede a l’autra endesfides di IIHF Global Girls' Games jié dut entorn tel mond da la Australia al Sud America. Te na gara scombatuda enscin al ultim moment, l é stat l Team Brun comanà dal staff con ite Eleonora Dalprà, Elisa Pavan e Francesca De Biasio a aer la soramessa per 3 a 2: do na parità per 1 a 1 a la fin del prum temp coi goi de Canesso Franci e Leimgruber, l Team Brun se à portà sul 3 a 1 tel secondo de gra a la steches de Vecchiarelli e De Doni e l à coscita podù gestir l vantac tel terzo, canche amò n gol de Canesso Franci l no é bastà al Team Bianch per troèr l pèr.

Tel Team Brun venjidor de l’endesfida l era ence la fascèna Agata Deluca. Clasc 2012, Agata Deluca l é na defensora di Falcons, pont fis de la squadra U.14 che à giusta conquistà n post per i playoff de Copa Tèlia.
Agata Deluca l é la più grana de la eles che jia tel setor mender di Falcons e la é coscita de ejempie per sia compagnes più joenes che jia te la categories più basses, tant te la U.8, che te la U.10, che te la U.12. Sie bon livel de jech no l é de didament demò per i Falcons ma l é cognosciù ence fora da la val olache la jiadora fascèna à tout pèrt a desvaliva scontrèdes e tornoes col Comitat Trentin.

De più su La Usc stampèda de en vender ai 14 de mèrz del 2025



 (Daniele Verra)