La Usc di Ladins

Per Stefano Gross, de beleche 39 egn e de chisc sche mec passé tel zircuit de Copa del Mond, l é ruà l moment de molar. Nasciù ai 4 de setember del 1986, ‘Sabo’ (dal sorainom de ciasa, Sabin) da Poza, l à tacà a jir coi schi da picol, col pare Gino e la sor maora Silvia, l é cresciù tel Ski Team Fascia e sobito l se à desmostrà feruscol. L à fat la Scola d’Art a Poza pech dant che vegne metù su l Ski College, l à tegnù dur per conjobiar scola e sport e l se à metù al luster te le garejade FIS de soa spezialità, l slalom strent, ruan ti prumes posć anter i Aspiranti e i Joegn.

Convocà te la Squadra nazionala, de 18 egn l é stat tout ite te le Fiamme Gialle, l grop sportif de la Finanza e sobito l é stat l mior di taliegn ai mondiai Juniores. Del 2008 su la Gran Risa l à abù l batum en Copa del Mond e anter i ‘gregn’ del schi mondial l é restà per 17 egn. L à varèà 165 oute l ciancel de gara del Copa del Mond, 9 chel di Mondiai e 3 chel di Jeghes Olimpics, olache a Sochi del 2014 l à falà l podie per 5 centeisemes.

Tel zircuit de Copa del Mond l se à vadagnà 12 podies e na cincantina de Top 10. L prum gran ejit l é stat del 2012, canche pean via col numer 40 l é stat bon de jir per 3 oute sul podie: terzo a Adelboden, secondo a Schladming e terzo a Bansko, l é ruà 5° te la classifica de Copa del Mond de slalom. Trei egn do, ai 11 de jené del 2015, a Adelboden l se à vadagnà la venta: te chesta ocajion l se à tout te man l schi te la posizion doventada so simbol: fajan mena de aer n schiop l à sbarà miran al zil, descheche l fasc canche l va a ciacia. »Per me chel segn vel dir ‘mira aut e rua al obietif’ – l aea dit – e l met ensema mie doi pascion. La ciacia a livel de ciaf la va n muie vejin con na gara: se cogn star cec e se conzentrar per sbarar miec, mingol desché canche se met fora i bachec e se sà che se cogn vardar de no se agitar massa per no far fai.«

Te soa longia cariera l à abù ence azidenc e momenc senestres, ma l é semper levà su e jit inant. Ti ultimes egn, avisa del 2021, del 2023 e acà n an sun Senales, l se à confermà campion talian e ades l sera su soa cariera ai Campionac taliegn assoluc che i vegn metui a jir proprio te Fascia

Ge aon domanà de si egn da atlet, de valch polemica canche l à anunzià de molar e de soe prospetive per l davegnir.

Se pel lejer duta l'intervista su La Usc nr 12 dai 28 de mèrz: sul sfoi stampà che se pel troèr ence te la boteighes de sfoes de la valèdes ladines o sul pdf per duc chi che à l abonament al e-paper.


 (Lucia Gross)