La Usc di Ladins

Ciel brun, soreie e portoes te la mior condizions ge à dat l benvegnù en domenia ai 30 de mèrz a duc i sozi del Ski Team Fascia (i era de beleche 200 demò i concorenc) che à tout pèrt al apuntament semper spetà del ‘Socialone’ che vigni aisciuda sera su la sajon sportiva su la neif con mingol de agonism e gran legreza.

Chest an l event é stat endrezà forin Ciareja, sul portoi de Pra di Tori, enveze i più picoi, chi del grop che l é stat chiamà ‘Pizza’, se à confrontà sul percors enjignà apontin per ic sul portoi del skilift ‘Le Pope’, sot l eie ascort de si maestres.
E fosc apontin i maestres l é stat chi che dapò à metù maor empegn per fèr bela fegura tel confront anter ic e ge dèr coscita sodesfazion a si picoi e joegn arlieves, che i li engaissèa con gran spetadives.
La premiazion, endrezèda al Refuge Antermont do na bona marena en compagnia, l é stat na festa olache l president Lorenzo Cemin, i componenc del diretif e i alenadores i à fat sentir duc venjidores. L servije fotografich l é stat fat da Foto Fassa Color de Poza.  (ED/LG)