La Usc di Ladins

Ai 13 de mèrz l'é vegnù a mencèr don Luigi Trottner, lascian anter la comunanza de Ciampedel n gran vet spirituèl, culturèl e soraldut uman, ajache dant de dut vegn semper la persona. Na mort senestra da azetèr, descheche l'é scialdi la mort, ruèda te n temp che no ge dèsc nience l met al dolor de fèr sie cors. No se pel dèr n ultim salut, no se pel zelebrèr la sepoltura, no se pel portèr n fior. No se pel strenjer na man o dèr n braciacol, dut chel che se vadagna l'é vèlch message de compascion.

Coscita à cognù se n jir don Luigi Trottner te ospedèl de Roveredo, olache l'à proà a descombater zenza suzess l Covid-19.

Con la departida de don Luigi, ence na comunanza restèda zenza preve, sessaben chela de Ciampedel. A un meis zirca da chel dì, ai 20 de oril l'é ruà da Trent l decret del Canzelier episcopal don Alessandro Aste, con stèmpel e sotscrizion ence de l’arzipiscop don Lauro Tisi che disc: »Cognan se cruzièr del ben spirituèl di fidei de na curazìa de la zona pastorèla de Fiem e Fascia, doventèda veta ai 13 de mèrz del 2020 […] con chest decret nomine l rev.do don Mario Bravin preve de la curazìa di Senc Filip e Giacum a Ciampedel«.

Ai 20 de oril l'é ruà l decret che Ve consegna la curazìa de Ciampedel, apede a cheles che jà aede. Sarèl n gran mudament per Vosc lurier?

Don Mario: Seguramenter l'é più lurier che dant, no pel che esser coscita, ma peisse de poder ge stèr dò a dut cant, con la consapevoleza che un pel fèr demò per un, aboncont. Secondo me la neva più grana no la sarà tant per me, piutost per i fidei de Ciampedel, che da lonch temp i à semper podù contèr su n curat de paìsc. Da ades inant i cognarà se usèr a spartir l curat con autra doi parochies e chest l costarà zenz'auter n gran saut de mentalità da pèrt de la jent de Ciampedel.


Su La Usc stampèda de gejia ai 30 de oril se pel lejer duta l'intervista.

 (Daniele Verra)