La Usc di Ladins

I prumes meisc del an l é tacà i lurieres per l restaure de Cèsa Cassan che ensema con Cèsa Costazza l é un di frabicac de mur più veies de Fascia, donca na testimonianza dalbon emportanta del passà de noscia val.

L ciasament de Cèsa Cassan l é n muie veie, l é stat fat su del ’500 e del ’700 l é stat endotà de na picola torn. L é n muie mèl metù e l aea segur besegn de n intervent emportant.

A se cruzièr de chisc lurieres l é l architet Alessandro Tamion del Studie Ghetta e Tamion de Vich.

L intervent nef l perveit la realisazion de 9 cartieres, tolan ite ence tobià, stala e magasin, sot la vida de la Soraintendenza de Trent. I esperc à dat indicazion de mantegnir duta la carateristiches del frabicat veie più che l é meso e de meter a post da nef dut chel l era jit desfat o roinà, tant daite che de fora. Su la facèdes se l é possibol vegnarà endò metù la fenestres olache les era al scomenz, cheles depentes del 1785, perché ti egn passé les é states smaorèdes, desfates ju, spostèdes, e aldò de la prescrizions de la Soraintendenza ge vel cerir de les fèr coche les era dant, magari ence con la dimenjion valiva.

De dut l projet de restaure se pel lejer su La Usc stampèda de en vender ai 17 de jugn del 2022.


 (CRI.M)