La Usc di Ladins

L é passà beleche 20 egn da canche, del 2003, do egn e egn che la vegnia domanèda, ence te Fascia vegnia avert na strutura per la jent de età. Te chisc egn gran l é stat l lurier portà inant per la tegnir viva e averta a la comunanza e fèr a na vida che duta la val se arvejine e tole pèrt a la vita de si giaves. N empegn no sorì che l Covid à descancelà te n senteamen, fajan serèr i ujes.

Do l’avertura del istà del an passà, canche l era stat ence endrezà na festa fora da la strutura, l uton l era endò stat serà i ujes, averc demò en pèrt chest’aisciuda e no se é amò rué a la normalità. Na situazion pesoca per i ghesć, per i parenc e per chi che laora e gestesc la strutura, che à portà ence a vèlch tenjion.

Ti ultimes egn l é stat desvaliva persones de referiment che à lascià sia encèria, trei componenc del Consei de aministrazion à dat la demiscions, doi demò ti ultimes 6 meisc. L CdA, nominà de november del 2019 e che restarà en cèria fin de november del 2024, tol ite componenc nominé da duc i Comuns de Fascia, e da enlouta o amò da dant fèsc pèrt Barbara Bravi per Ciampedel, Lucia Marchetti per Cianacei e Valli Graneris per Mazin. Per l Comun de Sèn Jan l era stat lità Maurizio Detomas, che à dat sia demiscions amò del 2020 e dapò Renata Bertacco, che se à demetù de oril de chest an; ades Sèn Jan é raprejentà da Marisa Costazza. Ence la conseiera de Soraga, Manuela Rossi, à lascià sia encèria chest istà e se speta l nef nominatif da man de l’aministrazion. En ultima chest istà l é vegnù a mencèr de colp Fabrizio Demartin, che raprejentèa Moena, e a corir sia encèria, ence tel ruol de vizepresident, l é ades Marco Ganz. Aldò de chesta demiscions i aministradores de Fascia à metù a jir na scontrèda co la presidenta e la diretora Elisa Emiliani, che de dezember del 2020 l’à vent l concors e l’à tout l post che dant era de Alessia Daprà e i se à tout l empegn de ge stèr più vejins a la Cèsa de Paussa.

Ence anter i dependenc l é stat palesà mingol de malcontent e per dut chest aon domanà fora la presidenta del CdA, Barbara Bravi.

Podede lejer duta l'intervista su La Usc stampèda de vener ai 7 de otober.

 (Lucia Gross)