La Usc di Ladins

L prum apuntament é en program jà doman, canche a Soraga vegn enaudà la mostra »Tita Pederiva Batiston 1905-1992«. La esposizion é stata endrezèda en colaborazion col Comun de Soraga e la vegn orida te La Gran Ciasa en sabeda ai 19 da les 4 domesdì. L’inaudazion, con la prejentazion del liber su la vita e la operes del artist, sarà viventèda da la cianties del Coro Nosc e dapò la mostra sarà da poder veder enscin ai 4 de dezember duc i dis domesdì da les 4 fin les 7 da sera. 

Ta Penìa vegn endrezà enveze la seconda edizion del laboratorie creatif per se fèr la Corona de Avent.
Se se bina lo da la veia scoles de Penìa en vender ai 25 da les cater domesdì per fèr ensema la Corona de Avent che dapò ogneun podarà se portèr a cèsa.
Teresa Dantone de la Lis dal Vera didarà duc a les fèr con dasces, ciandeiles, piotoles e vetes de ogne color e sort: dut vegn metù a la leta da la sociazion. Per tor pèrt ge vel se scriver ite al 0462 764545 (ence tras WhatsApp) dant de en mercol ai 23 de november. I posć é limité e l cost l é de € 15,00 a persona, con rebas a € 10,00 per i sozi de l’Union.

De più su La Usc stampèda de vender ai 18 de november.