La Usc di Ladins

Aea soscedà gran permèl te duta Fascia l at vandalich portà a compiment te la net anter i 20 e i 21 de otober te la cortina de Sèn Jan: chi che era rué lo a troèr sie parenc defonc o a rencurèr su la fosses tel se arvejinèr de la festes di Sènc e di Morc se aea troà dedant a n dejaster: fosses rebaltèdes su, croujes sbreghèdes demez, mèrmoi spaché e dans ence te la capela, olache l era stat spacà ite duc i vieresc, tacà fech daite e sbregà demez la plota de na nicia per la urnes.

En lunesc sera te la Pief n muie de jent se à binà per na scontrèda de orazion comunitèra, a chela che à tout pèrt ence l Piscop Lauro Tisi, che l paroch Andrea Malfatti à rengrazià de cher per sia prejenza. Te la orazions la comunanza à preà per domanèr perdon, per chel che fajon de mèl e ence per canche se sention miores che i etres.

Con sia ousc chièra e forta l Piscop Lauro à portà paroles de confort per la persones che é states ferides da chi fac encrescegoi, paroles de lauda per chi che sobito se à dat ju neteèr e rencurèr chisc lesc sacres e per duta la jent che à sentù l despiajer per l dolor padì da vèlch familia desche na ferida de duc, la se à strent sobito entorn a sia Pieif e a sia cortina e en gran numer l’à tout pèrt a la sera de orazions, desmostran de esser na vera comunanza.

De più su La Usc stampèda de vender ai 4 de november.  (Lucia Gross)