La Usc di Ladins

La popolazion del Comun General de Fascia a la fin del 2023 la é amò col segn negatif respet al an dant: mingol mender respet al 2022, canche a la fin del an l era stat registrà n smendrament de ben 46 persones, ampò la popolazion é amò jita ju de 12 persones: da 9.910 dai 31 de dezember del 2022 a 9.898 del ultim dì del 2023.

E a ne salvèr mingol l é la persones ruèdes ite: 287 en dut, 11 de più respet a la 276 se n jites fora dai comuns fascegn fora per dut l an. L scialdo naturèl enveze, donca la desferenza anter nasciui e morc, l é amò pior, con na desferenza de 23 persones, defat tel an 2023 l é stat registrà ti ofizies anagrafics de Fascia 79 nasciui e 102 morc. L é da dir che a Cianacei l é nasciù 2 picioi del 2023 che i é stac scric ite te Comun del 2024, donca i sarà tel moviment demografich del an che vegn.

Moena à perdù beleche 200 sentadins te 10 egn
Tel 2023 l comun che à smaorà de più l numer de si sentadins l é stat Soraga, che l à concostà 15 sentadins de più. Chest comun l era stat chel con la crescimonia maora ence del 2022 (+12), e a chesta vida, descheche podede veder da la tabela, l é ruà a 718 sentadins passan via Ciampedel che con n scialdo de -10 l é jit a 699. 
Soraga l é ence l comun che à abù l mior scialdo naturèl (+4): fora per l an l é nasciù ben 11 picioi e l é mort 7 sentadins.

De più, coi dac comun per comun, su La Usc stampèda de en vender ai 26 de jené.   (Lucia Gross)