La Usc di Ladins

Ai 15 de jugn del 1864 vegnia metù su a Milan la Crousc Checena Talièna col inom de »Comitat de la Sociazion Talièna per l socors ai ferii e ai malé en vera«, sot la presidenza del dotor Cesare Castiglioni. Da enlouta l é passà 160 egn. La storia de la Crousc Checena Talièna se à entrecià con la storia de nosc Paisc: ti momenc bie, ti gregn evenc, ti dejastres che à tocià nesc teritories, ma ence e soraldut noscia comunanzes.
»La Crousc Checena – à dit l president del Comitat de Fascia e Fiem Francesco Sommavilla – à besegn de persones de ogne età, percheche l servije no revèrda demò l’emergenza con l’ambulanza. Vegn fat atività de protezion zivila, logistica, consegna de magnadiva, vejinanza a persones scherdeiles e n muie de auter a favor de la comunanza«.
La Crousc Checena de Fascia e Fiem vel se orir a de neves volontères e per chest vegn endrezà n cors che taca ite ai 10 de oril e la prejenta sia atività e l cors per volontères te trei scontrèdes informatives: ai 2 de oril te la senta de Vich, ai 3 te la senta de Moena e ai 5 te chela de Ciavaleis, da mesa les nef da sera.

De più su La Usc stampèda de en vender ai 29 de mèrz.