La Usc di Ladins

Passèda la sajon da d’invern, l lurier se chieta ju, la ativitèdes turistiches sera e la jent se tol mingol de temp per se enstessa inant che tache endò ite l biteboi di meisc da d’istà. 

Te chest trat de temp i Servijes sozio-assistenzièi del Comun General de Fascia, en colaborazion col chino Marmolèda de Cianacei, à pissà de endrezèr na rassegna cinematografica. Cinch apuntamenc pissé per ge sporjer a la comunanza na ocajion de sozialità e de aprofondiment culturèl, ma soraldut per soscedèr na reflescion sun temes de gran atualità, ajache i film cernui i é duc chenc leé a temes sozièi. N projet sozièl e culturèl per ge dèr vita al teritorie. 

La rassegna à inom Ciak-socialCinema e la taca ite en mèrtesc ai 2 de oril con la pruma proiezion. Se trata de n film del 2023 che à abù n gran aprijiament de la critica: »C’è ancora domani« con la regia de Paola Cortellesi, olache vegn tratà i temes del ruol de la femena, de la familia, de la violenza su la eles e del derit de litèr.

La rassegna va inant en mèrtesc ai 9 de oril con n auter film de gran atualità che conta del dram di migranc, de stories individuales e la enrescida de fortuna te n Paisc forest. Viajes ries dal pont de veduda fisich e spiritual che no semper troa na bona fin. L titol l é »Io capitano« con la regia de Matteo Garrone.

En mercol ai 17 de oril vegn moscià »Perfect days« con la regia de Wim Wenders: la felizità per la picola cosses, la voa de troèr l equilibrie te nos, l contrast anter l mond de la natura e chel enjignà dal om. En mercol ai 24 de oril se pel veder n auter film che à abù gran suzes: »Killers of the flower moon« con la regia de Martin Scorsese. Chiò vegn contà de la gaitijia del dominie, la barbaria e la supremazia del om bianch sora i natives de l’America. De chest film podede scutèr ence la rezenjion de Jan Dellantonio per la trasmiscion radio »Zeche de curious«, jita fora de firé sun Radio Studio Record e che podede troèr sul sit internet de l’Union di Ladins de Fascia a chest link: https://www.ladinsdefascia.it/zeche-de-curious/killers-of-the-flower-moon?rq=Killers%20of.

Ultim apuntament en mèrtesc ai 30 de oril col film »Un colpo di fortuna« con la regia de Woody Allen sui temes del amor, la coinzidenzes de la vita e i equilibries de la cobia. Duc i film taca ite da les 20:45, l cost del biliet l é de 5 euro. 

Dassen na bela ocajion per se troèr e se confrontèr, per n aprofondiment sui temes sozièi de atualità. Te val aon la fortuna de aer l chino, na strutura che paa la speisa valorisèr ence con scomenzadives che nasc dal teritorie.  (MCI)