La Usc di Ladins

Pierluigi Decrestina de la Tislerai Decrestina de Soraga l é l nef president di artejegn de Fascia per la Sociazion Artigiani Confartigianato Trentino. L é stat nominà dai raprejentanc di comuns de Fascia che é stac lité te la radunanza di sozi de mèrz de chest an e che fèsc pèrt del Consei: Martino Lauton per Mazin e Ciampedel, Matteo Defrancesco per Moena, Dario Rasom per Vich, Laura Desilvestro per Poza e belapontin Pierluigi Decrestina per Soraga; per Cianacei no l é stat lità nesciugn. Chisc raprejentanc dapò à nominà Decrestina nef president per i 4 egn che vegn, Laura Desilvestro é stata endò litèda vize presidenta. La Sociazion Artejegn de Fascia tol ite 250 sozi artejegn.

Pierluigi Decrestina l é del 1969, l é tisler spezialisà te la costruzion de scèles per daite, sia firma la é te zona artejanèla de Molin a Soraga, l é scrit ite a la sociazion da 20 egn. L tol l post de Richard Pollam de la firma de marangons Pollam de Soraga, che à fat doi mandac e l ge tegn a sotlineèr che »l é n mudament tel segn de la continuità, con gran respet per Richard Pollam«.

De più su La Usc stampèda de en vender ai 30 de aost.  (Monica Cigolla)