La Usc di Ladins

En lunesc ai 9 de setember taca ite n nef an de scola. Endana che scolees, studenc, ensegnanc e personal de scola se enjigna, i bec più picoi e le maestre de scolina pel se tor n meis de paussa.

Noi chesta setemana verjon fora l liber di recorc e jon en do fin ai prumes egn ’70. Sion jic a domanar fora Flora Decrestina de Lucol da Soraga che per 16 egn la é stata ‘inserviente’ de la scolina de paisc.

Chi egn aló te scolina de Soraga l era la maestra Giusy da Tuenno te la Val de Non e te cojina l era Franca da Fornace – me conta Flora col liber di retrac avert tedant. Gio ere ja la penscion Carmen, aldidanché restorant Ja Vito, fajeve la cameriera e cheste doi femene ogne tant le vegniva ju a se beiver l cafè. Na sera la Giusy la é vegnuda ju pianjan, ge é domanà che che l’aeva e la me à dit che la Franca no la podeva più vegnir a far la coga te scolina e gio ge é dit sobito »vegne ben gio!«. Dant però cogneve fenir la stagion, endana l é vegnù ite da la Val de Cembra la Rita, la sor de don Damiano Eccli che l era sa Vich, e de setember é tacà. L era l 1970, aeve 18 egn. L prum dì che ge é fat da marena ere cruziada fora de mesura, me é pissà »mioditene se i envelene…«

Dant de jir te scolina é cognù jir ja Pardac a far n ejam desche chel de quinta popolara. No sé se l é passà o no ma no i troava nesciugn che jiva, i aessa cognù serar la scolina. La paga la era picola vè, 38 mile lire al meis, a far la stagion se n ciapava jà 80 mile lire.

Podede lejer duta l'intervista su La Usc stampèda de en vender ai 6 de setember.  (Monica Cigolla)