La valorisazion del teritorie de la Dolomites travers la cultura e la formazion artistica l é un di obietives de la sociazion ‘Le Muse e le Dolomiti’. Per arjonjer chest travert la se dèsc ju soraldut te doi sorts de atività: l endrez de conzerc e spetacoi e ge dèr na neva oferta formativa al teritorie. La vijion de la sociazion, vidèda da la presidenta Oda Zoe Hochscheid, l é chela de voler fèr su penc anter l mond amatorièl e chel profescionèl e per chest i doi pilèstres de ‘spetacoi’ e ‘formazion’ se tegn su l un col auter.
Al zenter de l’oferta formativa l é la Masteclass Internazionèla de lirica che à binà ensema te chisc egn passa 140 ciantarins e ciantarines a Falciade olache vegn fat la lezions e la proes musicales.
Del 2021 l é stat envià via la scola interregionèla de ciantèr e teater per bec e joegn che se à slarià fora ence te la valèdes de Fascia e Fiem e te chisc egn l’à abù dassen n gran suzes.
Per endrezèr i corsc, i spetacoi e i conzerc l é de besegn de forzes e per chest la Sociazion la é do che la chier n nef colaborador o na neva colaboradora che tegne i contac, la contabilità, la comunicazion, che se cruzie del endrez di evenc e de regoer i contribuc. Ajache la sociazion no l’à n ofize se pel lurèr da cèsa, l contrat l é per presciapech 10 ores en setemèna. L é temp per fèr domana e manèr ite l curriculum fin ai 10 de setember. Per informazions se pel jir sul sito internet musedolomiti.it e contatèr la presidenta al numer de telefon 342 9147711. (MCI)
‘Le Muse e le Dolomiti’ chier neva forzes
La sociazion à de besegn de valgugn che deide te l’aministrazion e per la produzion artistica. L é temp fin ai 10 de setember.
Galaria retrac
View the embedded image gallery online at:
https://www.lausc.it/valedes-ladines/fascia/27873-le-muse-e-le-dolomiti-chier-neva-forzes#sigProId4f2b4e1a01
https://www.lausc.it/valedes-ladines/fascia/27873-le-muse-e-le-dolomiti-chier-neva-forzes#sigProId4f2b4e1a01