La Usc di Ladins

Set partides jièdes, cinch amò da jièr e per endèna l Fascia é te la piena corsa, e anzi con vantac, per arjonjer l obietif che l se à metù dant. Per endèna i Falcons i é te una de la pruma doi piazes del qualification round, chela più nobola anter l auter, e con na partida de più da jièr respet ai aversaries.

L filot de set vitories sun set te chesta seconda fasa de campionat, à portà i Falcons a comanèr la classifica con 28 ponts. E chest no l era da dir de segur vardan a la pruma fasa de regular season, canche i Falcons à serà su l giron al 11° post sun tredesc. Perjen, 3 Zinnen, Valpellice e Fiem era ruèdes dant e per i ponts rité les partia te chesta seconda fasa ence con na mior posizion, con 10 o 9 ponts, i Falcons demò con 7. Ampò i fascegn no se à lascià bater ju e, venta do venta, i se à tout chel che i no aea, vadagnan teren su la aversaries enscin a les despassèr.

Anché, canche se à passà la metà del qualification round e mencia demò cinch partides a la fin, l Fascia se à tout la pruma piaza con 28 ponts totai (i 7 de partenza, più i 21 vadagné). Coi medemi ponts, l Fiem resta en seconda posizion, ampò l Fascia l à amò na partida de vantac da jièr col Como ultim en classifica, ajache duta l’autra squadres les é jà jites su la giacia 8 outes. Al terzo post, e donca la squadra più pericolousa per ge sofièr i playoff al Fascia, l é l Valpellice con 26 ponts.

De più su La Usc stampèda de en vender ai 7 de firé.  (Daniele Verra)