La Usc di Ladins

Te la Dì internazionèla del lengaz de la mère stata ai 21 de firé, nosc lengaz à abù na paladina deldut particolèra. I Servijes linguistics e culturèi del Comun General de Fascia col Conseier de procura Amedeo Valentini à pissà a n event fora de anter per l zelebrèr: te piaz de Comun de Sèn Jan a Poza l é stat endrezà ‘Sonèr la paroles’. Na performance musicala col artist da Vich Marco Mattia, espert tel ciamp de la musega, che se met semper bolentiera a la leta canche l é da lurèr e creèr col lengaz ladin. En vender domesdì Marco à portà te piaz i strumenc e i enjignes che l à te sie studie de registrazion e l à creà n DJ mix olache, col didament de Nicolò Dorich e Melany Locatin di Pop Corner, l à fat veder e sentir coche mescedan paroles, sons e musega pel vegnir fora zeche dalbon da bel. Amò de più se dut chest vegn fat duran paroles e sons ladins che, descheche à dit Marco Mattia, i à carateristiches dassen enteressantes: »L lengaz ladin l à parole n muie particolare – l à dit – perfete per far ritm che passenea con ogne sort de musega ence chela eletronica.«

De più su La Usc stampèda de en vender ai 28 de firé.  (Monica Cigolla)