La Usc di Ladins

I desturbes leé al autism i é n muie e desferenc: i caji cresc, i studies te chest setor i va inant e l é semper più besegn de esser informé e ciapèr consaputa de chel che vel dir aer apede persones autistiches e coche se pel fèr acioche sia vita sie più serena e chieta che l é meso.

Ai 2 de oril l é la dì mondièla sul autism, o miec la dì mondiela de la consapevoleza sul autism; la é stata metuda su del 2007 da l'Assemblea Generèla de la Nazions Unides (ONU) e la se met dant de fèr crescer la consaputa, la comprenjion e l'inclujion, sensibilisan duta la jent su l'emportanza de chierir de respetèr i deric de la persones autistiches e de fèr a na vida che les posse stèr te ambienc e situazion che smendre i problemes.
Da vèlch an la Coprativa sozièla Spazio-Tempo con a cef l musicoterapeut Biju Vadagnini la endreza adum con la sociazion Bambi la setemèna de Vacanza-terapia Alpine Butterfly; per la sostegnir ai 2 de oril, apontin te la dì mondièla sul autism, l Enaip de Tieser endreza la ”Cena Blu«, na cena de gala de benefizenza che vegn endrezèda oramai da 6 egn, pissèda e endrezèda dai studenc de la scola alberghiera de Tieser per crescer a livel profescionèl e tel medemo temp per sensibilisèr la comunanza sul delicat tema del autism.
Chi che vel aer maor informazions i pel tor contat con la Coprativa sozièla Spazio-Tempo chiaman l numer 348 0378308.

De più su La Usc nr 12 dai 28 de mèrz: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.

 (BV)