La Usc di Ladins

Le lönesc ai 12 d’otober dl 2020 á le presidënt de Paiern Markus Söder taié la vëta por inaudé na strotöra che rodâ ti cés oramai 20 agn denant. I baiun dl "Sudetendeutsches Museum" a Minca, che cunta storia, tradiziun y cultura de n popul cun na storia valgamia intravaiada. Chëstes popolaziuns de lingaz todësch che viô do la pröma vera tla republica cecoslovaca, é do le secundo conflit mondial gnüdes porcherades tl dër sëns dla parora. Trëi miliuns de sudec todësc á messü chirí altró n dagní, passa n miliun l’á ciafé te Paiern. Aldedaincö vëgn i sudec de Paiern odüs sciöche "cuarta stlata" dl teritore, dlungia i Altbayern, Franken y Schwaben. Por rové a chësta azetaziun ál indere orü ester n tru lunch. Le "Sudetendeutsches Museum" pón araté n travert important sön chësc percurs de reconziliaziun.
Da püch sán che la strotöra ciafará n diretur ladin, tla porsona de Stefan Planker, che é da 19 agn incá diretur dl Museum Ladin a San Martin de Tor. Nos un tut chësta ocajiun por s’la cunté impara y le damané co che chësta müda s’á porté pro, ci che l’á sburlé da surantó la inciaria y ciüna che é stada süa majera sodesfaziun te chisc feter dui dejenars tl Ciastel de Tor.

La intervista cun le diretur Stefan Planker ciafëise t’La Usc di Ladins di 21 de ma  (Intervista: Pablo Palfrader)