La Usc di Ladins

Tres indô sozedel ince tla Val Badia fac che lascia zoruch na saú antia y ince desplajëi. Un de chisc é gnü a s’al dé en jöbia ai 24 de merz da sëra tla tabacaria da La Ila. Le patrun Niky Varallo cunta: "Al é sozedü diesc menüc dan les 7. I ê te botëga cun la lodnera canche al é gnü ite na porsona cun mascora söl müs, á tut fora le cortel y â dit che i ne dên nia fá i eroi y ti dé i scioldi." Scebëgn che la porsona â le müs curí, s’un á patrun y lodnera atira capí fora de che che ara se tratâ. "Al ê bele denant sté te botëga", dij Varallo. Insciö ái mantigní sanch frëit y á lascé fá. "I sun stá dër calmi, ti un cinamai ciaré pro n pez", dij Niky Varallo, che s’la rí indô y é contënt che döt é ala jü fora a bun fin y che degügn n’é restá feris.
Pornanche le jonn söi 20 agn – nia dl post – é sté da üsc fora cun i scioldi, ái contaté i Carabiniers, che s’á atira ativé cun deplü patulies. N intervënt asvelt y apronté che á ince atira porté sü früc. "Do mesora l’ái bele abiné. An mëss dí che i Carabiniers á veramënter fat n bun laur. I mëssi ma ti fá complimënc", dij Varallo. Scebëgn che le jonn s’â bele mudé, ti á les forzes dl ordin ciafé le guant che al â indos y ince i scioldi che al â arobé. Le patrun á intratan dé jö i videos de sorvelianza olache an vëiga le fat, y á bele incö podü jí a se do i scioldi che ti ê gnüs mancia. Al sará spo les forzes dl ordin che jará inant cun l’iter preodü te chisc caji. La tabacaria ê intratan incö da doman indô daverta sciöche zënza.  (pablo)