La Usc di Ladins

"Cianté ladin" é n proiet dla Uniun Ladins Val Badia che stá por agn y agn de laur. Bele dl 2007 él gnü a s’al dé les prömes incuntades de n grup de laur metü a jí dala ULVB, por baié de co che le proiet dê ciaré fora y gnü fora él bëgn trëi publicaziuns amples y menüdes, che é garatades por man dl grup competënt metü adöm da Iarone Chizzali, André Comploi, Tone Gasser y Bruno Rives. So laur á porté daimpróia ala publicaziun de trëi libri de gran valüta, che cöi adöm, completëia y arichësc le gran patrimone de leteratöra musicala ladina. L’ultim "früt musical" de chësta trilogia é spo gnü completé dl 2019, canche an á podü dé ala stampa le terzo volum: "Cianté ladin – Cianties sacrales por cors tl ladin dla Val Badia". N liber sön chël che le team á lauré bun cater agn y che foss bele gnü presenté da n pez, sce al ne foss nia gnü danterite la ria coia dl Covid. Sëgn ésera stada tan inant, cun la presentaziun garatada en Lönesc de Pasca a San Martin de Tor. Por la realisaziun dl liber êl ince gnü invié ia n concurs de composiziuns, de chël che an á te chësta ocajiun ince tigní la premiaziun ofiziala, en presënza dl davagnadú Manuel Schuen y de Iarone Chizzali, che á arjunt le terzo post ala per cun Andrea Tasser. Na cercia dles cianties premiades y nia ân ciafé bele pro la gran mëssa, ciantada dai cors de dlijia da La Ila y San Martin de Tor. Y do la presentaziun él sté la Matinée culturala cun la cufada, döt smorjelé dala musiga plajora de Laura Willeit y Hubert Dorigatti.

Deplü sön la presentaziun de "Cianté Ladin III" y sön le concurs ciafëise t’La Usc di Ladins di 21 d’aurí  (pablo)