La Usc di Ladins

La Usc: Davide, da d’aisciöda aste surantut la presidënza dla Lia da Munt Ladinia. Cun ci spirit y ci motivaziun aste pa tut sö chësta inciaria de liam danter les lies da munt dla valada?
Davide Schuen: Fortunato Flatscher, che â fat presidënt da impröma incá, â bele dé da capí che al orô bel plan dé jö chësc laur. Sambëgn n’él nia saurí da ciafé zacai che le fej y insciö s’ára porté pro che i l’á iö tut sö. I á bele lauré cotan d’agn pro le grup jonil, i conësci la lia da munt, porchël n’êl nia che i gniss sciuré t’ega frëida. Insciö m’ái ponsé: ciodí pa nia? I pënsi che al é na inciaria che pó ester dër ampla, deache al é dër na gran uniun, cun 1.985 iscric – da Calfosch cina a La Pli. Porchël vëighi che ara jiss da fá de beles cosses. De ci vers che i s’armoiun spo tl dagní fajarunse fora deboriada tl comité, cun chël che i s’incuntun plü gonot. Mi compit vëighi n pü’ chël da trá adöm düc i fis danter i grups de laur.

Tl comité nü él cotan de porsones dolarata jones. Pón dí che la munt tira ti ultims agn indô deplü la jonëza, ince do le gran laur che la Lia á fat y fej cun i mituns?
Chësta é na bela domanda. Iö la odess ince insciö, mo nosc feedback vá n pü’ sö y jö. I un albü agn olache al ê gran interes, al momënt mëssi dí che al é na certa stagnaziun. A vigni moda vëighi bëgn che al é n gröm de jogn che vá sö por munt. Tröc jará ince por so cunt tl tëmp lëde y nia tres la lia da munt. I dijess zënzater che dan da 20–30 agn êl manco jogn che jô sö por munt. Chësta é mia impresciun.

 (Intervista: Pablo Palfrader)