La Usc di Ladins

Sce i agnui custodi esist – ci che i crëii personalmënter – spo êi en sëra de nöt zënzater ince da San Ciascian ite, olache ai á fat so laur indortöra. Dala 1:20 él gnü cherdé i Stödafüch da San Ciascian, olache na desëna de omi s’á metü sön tru por jí devers Armentarola, olache al ê sozedü n inzidënt, tles vijinanzes dl alberch Valparol. "N ël che jô itepert s’á bonamënter indormedí y é salté tla sí dlungia strada", cunta le comandant di Stödafüch Devis Crazzolara. Tl impat á na tre dla sí spaché ite la scëiba y a despassé döt l’auto, jon bel danter i sic fora a splundré sö por la tofla di comani dl auto. An pó bëgn dí che al é sté n te mez miracul che le ciafêr – n ël talian che fej la sajun – ne s’á fat net nia. Sambëgn é la spordüda stada dassënn grana. L’alarm é gnü fat da na porsona che passâ ince de chi versc y á odü le sozedü. Insciö él gnü cherdé Stödafüch, Carabiniers y ince Crusc Blancia, che á por fortüna podü s’un jí zënza messëi trasporté feris. Ince le comandant Crazzolara dij: "Por fortüna él ma dann material, ara podô jí cotan da peso." I Stödafüch á dedô fat so laur, romené sö y assiguré la sí, tratan che l’auto é gnü lascé condü demez. Chël é bëgn cotan desfat.  (pablo)