La Usc di Ladins

Ciamó cina ai 14 de setëmber él da amiré tla libraria da Bornech »Rien­ ztor« la mostra de fotografia de Wolf­gang Rieger, musizist de profesciun y fotograf por pasciun.

Cun la mostra »Alta Badia–N ater punt d’odüda / Anders gesehen«, descür l’artist Wolfgang Rieger, sciöche ince le titul anunziëia dan­ fora, impresciuns dl post da n punt d’odüda particolar: le so. »Les foto­ grafies é le resultat de na confron­taziun cun le paisc nadé de mia fomena y nasc da gran atenziun, respet y stima devers de döt ci che á a ci fá cun la realté ladina«, dij le fotograf.

Wolfgang Rieger, che vir a Graz, é ti ultims dui dezens rové tres indô devers tl’Alta Badia y chësc nia sciöche scior, mo – al dij instës, sciöche n »ghest de parentela«. Te chësta spana de tëmp ál podü cöie adöm plü impresciuns y esperiënzes de chësta localité, che é chëra de süa fomena, chersciüda sö a La Val tl cör dla al Badia.

La coriosité é ci che l’á sburlé a osservé les formes che se presentëia tres indô danü, y la ligrëza da soghé cun chëstes á porté pro ales creaziuns fotografiches che condüj fora por n iade fat de detais. Massa dlungia ala vita dla localité por ester n scior, mo ince dalunc assá dales raisc ladines; da chësta posiziun á l’artist archité le momënt te imajes, implides de socrëc, de na realté ciamó tacada al tëmp passé, mo te chëra che la modernité se fej lerch n pü’ al iade.


Liede deplü tla ediziun nöia de vëndres, ai 30 d'agost!