La Usc di Ladins

Personalmënter ne me recordassi nia che al foss n iade gnü benedí trëi auti te n iade. Insciö ésera indere stada en domënia dan otedé a Al Plan, olache la Crusc Blancia, i Stödafüs y l’Aiüt Alpin á podü lascé benedí ite deboriada n auto porom, che sorvësc por so aiüt al proscim che ai desfira de por de, 365 dis al ann. Al fajô bëgn na certa impresciun da odëi volontars de dötes trëi les uniuns metüs sö un dlungia l’ater cun süa divisa. Y al dê ince n sentimënt de segurté da savëi che sce ara fala de val’ vers, él desënes de porsones che an pó cherdé vigni de y da vigni ora. Che al ó ince ester i mesi aladô, chël é bëgn da capí. La benedisciun é gnüda a s’al dé do la gran mëssa, sön plaza de dlijia, olache siur Klaus Sottsas á cherdé jö l’aiüt de Dî sön i mesi y sön chi che i adora. La Crusc Blancia d’Al Plan á baraté y ciafé n’ambulanza nöia por i intervënc d’emergënza, i Stödafüs d’Al Plan á cumpré n quad che é garaté cun finanziamënc dal PNRR tres le proiet "La Pli - n tesur da descurí", l’Aiüt Alpin s’á arjigné n quad modern dantadöt por i intervënc d’invern te munt, cun iadô na gran cabina scialdada, che pormët n trasport sigü y efiziënt di paziënc. 

Deplü podëise lí t’La Usc di Ladins di 28 de forá  (pablo)