La Usc di Ladins

Emanuel Pescollderungg da La Ila y Elias Mersa da Calfosch frecuentëia intrami la cuinta classa dla Scora profescionala dl’agricoltöra a Dieten­heim. Danter i compic te chësc ultim ann de stüde, i tocâra da lauré fora n proiet particolar. Insciö él nasciü le proiet »Gesunder Garten« (Urt Sann). Tla sostanza ái cherié na coltöra naturala, che vëgn arjignada – dit dër ala scëmpla – cun ciorda y lana de biscia. Ara dess sorví dan­tadöt por inculté te na manira so­stenibla i urc y i ciüfs de ciasa. Por la produziun, sce an ó dí insciö, orôl ester na mascin aposta, che i dui studënc s’á comané da internet. La coltöra organica y la lana de biscia vëgn da dui lüsc dla Val Badia. Por ti dé vita lungia al proiet, ái ciafé la colaboraziun dl Zënter Sozial La Spona da Pidrô, che fej sëgn instësc la coltöra naturala y la pitará te süa botëga. Le proiet á insciö na sostenibilité ambientala, economica y ince soziala.

Deplü sön chësc proiet nes á cunté Emanuel y Elias instësc. I podëis lí deplü t’La Usc di Ladins di 28 de forá.  (pablo)