La Usc di Ladins

Al mancia ciamó püch plü co n mëis ales lîtes de Comun di 4 de ma. Les listes é dades jö y ince i candidac a ombolt é bele nominá. Tl comun de Mareo gnarára ince chësc ann interessanta, ince deache al rovará ite por le pröm iade 18 porsones te Consëi (impede 15) y 6 porsones te Junta (impede 5), deache le comun á despassé i 3.000 abitanc. Litadësses y litadus podará chirí fora danter cater listes y trëi candidac a ombolt.

Sön la lista "Al Plan" él indô Albert Palfrader che se mët a desposiziun sciöche candidat a ombolt. Ël á bele mené le comun por cater legislatöres. Sön lista él ciamó 13 ëi y 9 ëres che se mët a desposiziun por le Consëi. La lista "Paisc d’La Pli" á sciöche candidat l’ombolt atual Felix Ploner, lité de setëmber dl 2020 y che se mët a desposiziun da porté inant le laur fat te chësta legislatöra. Por le Consëi candidëia ciamó a La Pli 10 ëi y 5 ëres. Intrami i candidac s’â bele mosoré pro les ultimes lîtes. La novité de chësc ann é le candidat a ombolt Stefo Palfrader, che se mët dancá sön la lista surafrazionala "Düc Adöm", olache al sará ciamó 15 candidac y 8 candidates por le Consëi. Al é spo ciamó la lista "Rina", che n’á degun candidat a ombolt, mo ti pîta ai litadus 6 candidac por le Consëi – 4 ëi y 2 ëres.

T’La Usc di Ladins di 28 de merz ciafëise i inoms de dötes les candidates y düc i candidac, sciöche ince na intervista cun i trëi candidac a ombolt  (pablo)