La Usc di Ladins

Al é preodü dui intervënc sön la strada statala dla Val Badia (SS244) danter i comuns de Mareo y de San Martin de Tor: ara se trata de mosöres de proteziun por mëte en segurëza la strada dala tomada de peres. Te süa sentada di 25 de merz, á la Junta Provinziala aprové i intervënc tecnics y i cosć stimá por trami i proiec. 
"I efec che le chefer á albü söl bosch nes sforza da fá chisc laurs, y da i fá cun prescia, por ti garantí plü segurëza ala strada dla Val Badia", sotrissëia Daniel Alfreider, assessur provinzial ala Mobilité. L’apalt por i laurs gnará publiché tosc. "Sce le cosses vá iannt zënza problems, podess i laurs mëte man bele da d’altonn dl 2025", injunta l’assessur provinzial. 
Le pröm intervënt, tl comun de Mareo, é preodü danter le chilometer 10+000 y le chilometer 10+500 dla strada dla Val Badia; i cosć de chësta opera vëgn stimá sön 750.000,00 euro. Le secundo intervënt, tl comun da San Martin de Tor, é preodü danter le chilometer 11+500 y le chilometer 12+800, por n cost stimé de incër 2,5 miliuns de euro.