La Usc di Ladins

A trei egn da sia nomina, stata de mé del 2021, l’Autorità per la mendranzes linguistiches de la Provinzia de Trent à endrezà en lunesc ai 27 de mé te la sala grana del Istitut Cultural Ladin, descheche l era jà stat fat ti egn passé, na scontrèda coi raprejentanc istituzionèi de Fascia per tor dant la costions de maor emportanza per i ladins.

La presidenta de l’Autorità Katia Vasselai ge à dat l benvegnù a duc i prejenc, pean via dai raprejentanc de Fascia: l procurador del Comun General Giuseppe Detomas, l conseier ladin Luca Guglielmi, l president a interim e la diretora del Istitut Cultural Ladin Bernardino Chiocchetti e Sabrina Rasom, i vizepresidenc de l’Union di Ladins de Fascia Stefano Weiss e Melissa Locatin e vèlch ombolt di Comuns fascegn. Apede a ic l era l president del Consei provinzièl Claudio Soini e desvalives conseieres componenc de la 6^ Comiscion: Walter Kaswalder, Francesco Valduga, Francesca Parolari e Vanessa Masè, e ence la funzionaries de Ripartizion e Ofize Mendranzes de la Region Trentin Sudtirol e del Servije Mendranzes de la Provinzia de Trent con la neva dirigenta Elisabetta Sovilla.

N benvegnù e n rengraziament particolèr da man de la presidenta Vasselai é jit dapò ai etres doi componenc de l’Autorità, l zimber Matteo Nicolussi Castellan e la mochena Chiara Pallaoro, con chi che, à sotrissà la Presidenta, te chisc trei egn aon lurà dassen delvers. Te chesta scontrèda – l’à jontà ite – desche te cheles jà metudes a jir coi zimbres e coi mochegn, nosc ruol desche Autorità per la mendranzes l é soraldut chel de scutèr i raprejentanc del teritorie e tor su sia istanzes.

De più su La Usc stampèda de en vender ai 31 de mé.  (Lucia Gross)