La Usc di Ladins

"Despassé i confins" é le motto dla presidënza südtiroleja dla Euregio, che passenëia ince por le De dla Mobilité tla Euregio, che vëgn indô pité la sabeda ai 9 de novëmber. En chësc de podarán anuzé debann le trasport publich regional dles provinzies de Balsan, de Trënt y dl Tirol austriach, tan co da Kufstein fina Borghetto. L’iniziativa vel por düc chi che á na cherta dl trasport publich: tl Südtirol él l’Euregio Family Pass y dötes les chertes anuales o de mez ann, tl Trentin vel ince i abonamënc de n’edema o n mëis. An podará porchël anuzé debann corieres, ferates regionales y ince i implanc portamunt che fej pert dl trasport publich. Stlütes fora é les ferates suraregionales sciöche i Frecciargento, Railjet, Eurocity y Intercity.
Le trasport debann vel ma por i viagiadus instësc, tan co chi che á la cherta, deperpo che le trasport de rodes o tiers é inant da paié. Por informaziuns plü menüdes sön caji spezifics, pón consulté i portai internet www.vvt.at (Tirol), www.suedtirolmobil.info (Südtirol) y www.trentinotrasporti.it (Trentin).