La Usc di Ladins

Na festa plajora él garaté en gaujiun dla segra d’Al Plan, olache i Stödafüs dl paisc á podü recordé le gran iubileum de 125 agn. Do che an á metü man la sabeda sëra cun musiga y aorela cörta, é la festa ofiziala gnüda a s’al dé la domënia ai 11 de setëmber. Dales 9:30 é piada ia da magazin di stödafüch la marcia dles organisaziuns, cun totes y autorités, acompagnades dala Musiga d’Al Plan. Te dlijia él spo gnü zelebré la gran mëssa da festa y de rengraziamënt, abelida solenamënter dala musiga dl paisc. Do la santa mëssa éson passá al at ofizial sön plaza dla festa, cun la cornisc dles bandires di stödafüch. Le pröm salüt é gnü dal comandant Christian Rindler y dedô á Pablo Palfrader presenté le liber "125 Agn Stödafüs d’Al Plan", che cunta dla storia y di avenimënc che á caraterisé chisc 125 agn dla uniun. An ciafa le liber da cumpré tles botëghes di foliec Mascotte y Sauter, sciöche ince tl minimarket a Longega. Le danmisdé é jü inant cun onoranzes, discursc d’ocajiun, musiga y aorela cörta. Da sëra s’á stlüt jö i festejamënc cun n spetacul de jüc d’ega.

Deplü sön la festa ciafëise t’La Usc di Ladins di 16 de setëmber. Chiló ves pitunse n iade valgünes impresciuns fotografiches.

Dötes les fotos: Gianvito Coco