La Usc di Ladins

Se à serà su anché, mercol ai 23 de mèrz, sul Abetone i Campionac nazionèi de schi per la categories Ragazzi e Allievi. N grum de atletes e atlec ladins à passà la calificazions e à tout pèrt a la garejèdes de slalom strent, slalom lèrch e SuperG, da en domenia ai 20 de mèrz fin a mercol.

Chiò meton al luster doi atlec fascegn che en mercol ai 23 se à metù dintorn al col la medaa più bela, chela de or: Thomas Liberatore, fra de Federico atlet de Copa del Mond, scrit ite al Ski Team Fascia che é ruà prum tel SuperG Under 14 e Federico Fontana de la Monti Pallidi, scrit ite al Ski College de Fascia, che é ruà sul prum sciaier tel slalom strent Under 16.

Bogn resultac ence per i etres atlec ladins.

Mattia Valente del Schi Club Cortina, categoria Under 14, é ruà 2° tel slalom lèrch e 4° tel SuperG e Andrea Salvati del Schi Club Druscié, de la medema categoria, é ruà 3° tel slalom strent.

Amò te la categoria Under 14 l é Philip Ploner del SC Rèba che é ruà 6° tel slalom lèrch e Arianna Putzer del Schi Club Gherdena che se à classificà 7^ tel SuperG.

Bogn piazamenc ence te l’Under 16: Rita Granruaz de ST Auta Badia é ruèda 4^ tel SuperG e 10^ tel slalom lèrch e Annika Rose Johannson, sia compagna de squadra, é ruèda 6^ tel SuperG.

Anter ic Matteo Avesani del Schi Club Druscié l é ruà 3° tel slalom strent, 4° tel slalom lèrch e 8° tel SuperG, David Granruaz del ST Auta Badia l é ruà 5° tel slalom strent e Leonardo Farina del Ski Team Fascia l é ruà 9° semper tel slalom strent.  

 (MCI)