La Usc di Ladins

Che bel l derby de la Veisc. En jebia ai 13 de firé fora Ciavaleis se à dejout la partida de Italian Hockey League anter Fiem e Fascia. Na partida emportanta per l cef de la classifica, che ge à tinultima dat rejon al Fiem con n resultat de mesura, e che ge à metù dant al publich trop più che na scempia gara de hockey.

Jà dant che scomenze l match, te n stadie pien e ciaut, l é scomenzà n show lonch duta la sera. A dèr l via i bec del setor mender che, bandieres te man, i é jic su la giacia dajan forma a na bela coreografia. Na gran acolienza per i jiadores de la Senior che coscita i se à sobito ciareà, ma ence n bel spetacol per l publich che dal aut à podù aprijièr i colores de sia squadra.

Se la partida jièda al Scola ge aea dat rejon ai Falcons sul pian del resultat, ma no sun chel del jech con na proa miora del Fiem, la partida de Ciavaleis la é stata equilibrèda, fosc con più ocajions fascènes. Testamonech ence la 31 trates totales de contra a la 20 fiemaces, ma chest’outa l resultat ge à dat rejon al Fiem. Jà tel prum temp l é stat i śai-neigres a se portèr inant al 15° menut con Kizlo en power play.

De più su La Usc stampèda de en vender ai 21 de firé.  (Daniele Verra)