La Usc di Ladins

Ci che à acaro de lourà su par ra nostra montes, co ra besties, intrà ra crodes, pó fei domanda a ra Regola granda de ra montes da Vodo, par doi brite, che i vó fità. Un ‘l é el brite de Ciauta, a man dreta de ra Val de ra Boite, a vardà in fora, sote el Pelmo. Se và su in machina da Vodo; se rua anche a pe, da Borcia. L é a 1.552 metre, una ciaśa duta noa, fata fora śa poche ane. Canche i aea daerto chesto local, el prin a ‘l tuoi su, a ‘l fei śì, ‘l ea stà propio un de Anpezo. Pede ‘l é ra stala par i besteame e nafré de caśel, da lourà el late. Duto d’intorno ‘l é na monte da 19 etare, 190mile metre. I fita duto chesto par zinche ane; se paga 12 mile euro a ‘l an. Par toi parte al bando ‘l é da ese contadis, da sole o aduna con de outre, e ‘l é da mostrà de aé fato chesto laoro par almanco doi ane. Chel outro brite ‘l é a Rutorto, a 1.670 metre, ves Zoldo. Par fità chesto ‘l é 32 mile euro a ‘l an. L é da mandà via ra domandes ignante de i 28 de febraro che vien. Par in saé depì se pó domandà a ra Magnifica Regola granda de ra montes de Vodo, inze chesto paes de ra Val de ra Boite.

De plu tla edizion stampeda de La Usc di Ladins o sun l e-paper a paiament www.lausc.it/e-paper