La Usc di Ladins

I profrescionisć sanitères che laora te le RSA à besegn sobito de despositives de protezion (D.P.I.) per portèr dant en segureza l lurier e l’atività de ogne dì con la jent de età. L’é l’apel che auza fora l’UPIPA, l’ent che tol ite le APSP-RSA de la Provinzia de Trent, che à envià via chesta scomenzadiva de regoeta de couribocia en colaborazion con la sociazions sindacales e l se cruziarà ence de i dèr fora a le APSP aldò de l’emergenza.

Ence la Cèsa de Paussa de Fascia à de besegn sobito de aer despositives de protezion. La se ouc per chest a la firmes del post de tisleres, muradores e pitores e autres che te chest moment à cognù lascèr sù l lurier e i à te cèsa couribocia che ge vanza e che no ge serf. Vegn chierì couribocia chirurgiches o de sort FFP2/FFP3, ence en pìcola cantitèdes, dut pel servir.

Per aer maor informazions o per meter a la leta chel che serf se pel chiamèr diretamenter la Cèsa de Paussa a Sèn Jan al numer de telefon 0462 760240, passarà valgugn del personal a tor sù i despositives de protezion.

 (mci)