La Usc di Ladins

En lunesc ai 11 de oril l é stat na dì de gran legreza per duc chi che à parenc te la Cèses de Paussa, che i à endò podù jir te l’APSP a troèr sia jent con manco limitazions, pur semper aldò di protocoi de segureza: l green pass renforzà pervedù per chesta strutures, l couribocia FFP2 e l’igienisazion de la mas, ma con la libertà de poder jir ite e ge stèr apede a sia jent più al lonch. 

Ence te la Cèsa de Paussa de Fascia chel dì l é stat metù en doura la neva desposizions dates fora da la Provinzia de Trent pec dis dant. La presidenta Barbara Bravi e la diretora Elisa Emiliani aea provedù sobito a ge manèr ai familières di utenc na letra con la bela neva tant spetèda, che segna n pas inant envers na situazion de normalità.

Te la strutura per la jent de età de val l é stat fissà n orarie per la vijites: da les 9 a les 12 e da mesa la does fin les 6 da sera i familiares pel restèr apede a sia jent. I à l met de jir ite dal ciancel zenza cogner se prenotèr, i cogn demò fèr i controi pervedui dant de jir ite dai ujes, enveze tel piaz de fora se pel stèr coi parenc ence zenza zertificat vert renforzà e zenza couribocia.

De più su La Usc stampèda de vender ai 15 de oril.  (Lucia Gross)