La Usc di Ladins

La Cèsa de Paussa de Fascia se enjigna a festejèr i 20 egn. A la dir duta l’ativitèdes per recordèr chest cedean toron é jà tachèdes ite e te cèsa ence i ghesć à jà tacà a sentir n cert busiament… de idees e de jent. Via per chisc meisc da d’istà, l temp mior per verjer i ujes de la majon, i ghesć pian pian à endò podù ciapèr ite coi projec che i aea cognù lascèr su col Covid e jir fora sul teritorie. No i é de persona, ma anter la jent podon i veder ence tras i bie retrac che é stac metui sui 10 tulins che fèsc bela parbuda enlongia strèda sot la Cèsa de Paussa. Retrac, paroles, pensieres, emozions che ne fèsc cognoscer miec la jent, la vita e chel che l é vindò chi gregn vieresc.

Per n saer de più aon domanà fora la presidenta de la Cèsa de Paussa de Fascia Barbara Bravi.

Presidenta, co éla nasciuda l’idea de chesta mostra sul teritorie?

Barbara Bravi L’idea la é vegnuda da Serena Pederiva de l’animazion che me à dit che l’aessa abù piajer per i 20 egn de la Cèsa de Paussa de meter fora la storia, coscita aon vardà fora i retrac e en colaborazion con la Majon di Fascegn, con chela che l é jà dotrei egn che fajon desvaliva robes desche l Calandèr, aon metù fora chisc tulins che se podarà veder fin ai 10 de setember. L é retrac de chisc 20 egn de la Cèsa, dal scomenz ai ultimes egn, l é su ence l prum diretor e i prumes ghesć, canche la é stata averta de dezember del 2003 n era 5 o 6. I pensieres che l é scrit fora, che se pel ence scutèr col codesc QR, i é di operatores che à volù se meter a la leta, chi da ades e vèlch un dai prumes egn. 

De più su La Usc stampèda de vender ai 11 de aost.  ( Monica Cigolla)