La Usc di Ladins

Entorn la fin de november i scolees de la mesènes de Sèn Jan i à abù tout pèrt a na ‘lezion’ fora de anter. Chi te sia aula e chi te la gran sala de la Sorastanza, i bec de duta la 7 classes de la scola i à podù cognoscer Harriet, travers n projet de letura animèda, na scomenzadiva che é stata metuda a jir col contribut del Comun de Sèn Jan.

Chesta ‘lezions’ particolères é states fates dal ‘Teatro delle Quisquilie’ del Teatro San Marco de Trent, che con l’interpretazion de Laura Mirone e Veronica Risatti l porta stroz per la scoles la letura animèda de la storia che à per titol »Oh Harriet!« e la vegn fora dal liber col medemo inom scrit da Francesco D’Adamo e dat fora dal editor Giunti.

I bec i à podù coscita cognoscer a na vida gustegola e enteressanta la storia vera de Harriet Tubman, na ela schermolina e con pecia sanità, ma con gran idealism e vijion, che ensema con de etres compagnes la é stata bona de pissèr e realisèl la »Underground Railroad«, averjer la strèda secreta che ge à permetù a mile e mile schiaves de sciampèr envers la libertà.

De più te la Piata de la Scola de La Usc stampèda de en vender ai 15 de dezember.  (LG)