La Usc di Ladins

Roberta Silva del Refuge Roda de Vael la é stata confermèda presidenta de la Sociazion di Refuges da mont del Trentin. L lo à dezidù l Consei diretif che se à troà en mercol ai 13 de november e l ge à renovà coscita l’encèria e la stima per etres 3 egn de mandat. Vize president l é stat confermà Raffaele Alimonta.

L Consei diretif é stat lità en ocajion de la radunanza generèla di sozi che é stata chiamèda ite ai 28 de otober te la senta Asat - Confindustria de Trent e olache l é stat confermà 5 conseieres sun 7: Roberta Silva, Raffaele Alimonta del Refuge Alimonta, Jacopo Bernard che chest’aisciuda à tout su en gestion l Refuge Ciampedie, Daniele Rosi del Refuge Pas Principe e Francesca Debertol del Refuge Contrin; i neves conseieres l é Alberto Bighellini del Refuge P. Marchetti allo Stivo e Walter Lorenz del Refuge Cima 11 che é stac nominé al post de Lorenzo Battisti del Refuge Pertini e Mara Iagher del Refuge Treviso che no se aea più metù a la leta per rejons personèles.

A la radunanza generèla la presidenta Silva à portà dant sia relazion. »Enceben l burt temp del scomenz de la sajon da d’istà, su en aut l era amò la neif, e la pievia de chest uton, l’imprescion generala l é che l enteres per nosce struture sie stat segnificatif - à dit la presidenta Silva te sia relazion. En particolar aon vedù n smaorament de le prenotazion per dormir te utia sa mont ence se te valch post enveze l é ruà manco jent via per l dì. Chest purampò, ence en conscidrazion de le gran prejenze ti ultimes doi egn do l Covid e l risech de n overtourism, podessa aer n efet positif per la sostegnibilità de nosc teritorie. Via per l istà aon vedù n smaorament de ghesć da neves marcé, en particolar da Stac Unii, Australia e valch paisc asiatich. Per chel che varda l marcià de l’Europa aon vedù n muie de jent da la Germania e dai Paijes Basc, ma ence da Austria, Franzia, Spagna e autre nazion.«

N recognosciment spezièl a Marco Desilvestro
Endèna la radunanza ge é stat sport n recognosciment spezièl a Marco Desilvestro per si 63 egn te Refuge Gardecia. Al scomenz de otober, do aer serà su la sajon da d’istà, l à anunzià che l lascia l lurier de responsabol. A portar inant l refuge de familia, fat su del 1902 da Bepo de Medil, sarà ades so fra Mario co si fies Simone e Giuseppe.

De più su La Usc stampèda de en vender ai 15 de november




 (Monica Cigolla)