La Usc di Ladins

L à 36 egn, Riccardo Defrancesco del Comino da Moena, e oramai da beleche 10 egn l porta inant sie empegn profescionèl fora per l mond per didèr ti lesc de vera.

Del 2010 l se à laureà infermier, dapò l à lurà tel ospedèl de Rorei te la medejina sub-intensiva e te Fascia desche infermier sul teritorie. Jà da canche l studièa l aea la volontà de jir a fèr na esperienza con organisazions che se dèsc ju per la sanità ti lesc de vera e l à portà dant sia domana a Emergency. L à passà na selezion strenta, olache vegn tegnù cont de la motivazions e de la capazità de ge fèr front a situazions de emergenza, ence de gra a l’esperienza de prum socors fata a Rorei e del 2016 l é partì per la Libia per fèr 6 meisc con la sociazion de Gino Strada. Con Emergency l é stat dapò tel Kurdistan irachen e tel Afghanistan, olache l à fat na esperienza dassen forta tel zenter chirurgich de Kabul. Te chesta organisazion l à cognosciù sia compagna, che la é da l’Inghiltera e la fèsc la pediatra, e dapò ensema i à enterzà tempes de lurier ti lesc de vera a etres te si Paijes che permet de smendrèr mingol la tenjion.

L uton passà sia esperienza ti lesc de vera ge à dat l met de jir a Gaza, olache la situazion jà trop senestra da egn la é doventèda dramatica do i 7 de otober del 2023. Per zirca doi meisc, anter setember e november 2024, l é stat coordenador di infermieres tel ospedèl sostegnù da Medizi zenza confins (MSF). En jebia ai 20 de firé te la scoles de Moena l à portà sia testimonianza e n muion de jent à empien te ogne piz la gran sala Simonin Maza per la scutèr.

La sera é stata endrezèda dal Grop Ladin da Moena su spenta de Luca Follador, dotor e amich del ‘Defra’, coche i lo chiama apontin si amisc e chisc doi joegn sanitères de valuta é stac rengrazié da la presidenta del Grop Ladin Angela Chiocchetti e da la vizeombolta de Moena e patrona de cèsa Cristina Donei.

De più su La Usc stampèda de en vender ai 28 de firé.  (Lucia Gross)